Îdir bajaranê herêma Serhedî ra yew o ke bi hewayê xo yê nermî û awanîya xo ya kozmopolîte yeno şinasnayene. Seba Îdirî wextêk vatêne “Kelayê MHP’yî”. No bajaro ke Kurd û Azerî têhet de ciwîyenê, serranê 90’ine de wexto ke MHP weçînitişanê cayîyan de ser kewt, taxê Kurdan xizmetî ra bêpare ameyî verdayene. Ne vera polîtîkanê bînan de û ne zî nê polîtakayanê cîyakarîyan ê dewlete de mabênê Kurdan û Azerîyan, Terekeme û şaranê bînan de perseyêk vejîyaye meydan.

Kurdî serra 2009’î de weçînitişanê cayîyan de zî vera provokasyonanê MHP’yî ser kewtî. Bado ke şaredarîya Îdirî girewte, wezîrê AKP'yî yê ê demî Cemîl Çîçekî vat, “Reştî sînorê Armenîyan” û dewamê ci de “Ma do heme çîyan şima rê zî bikerê” . Weçinitişî ser o 6 mengî derbaz nêbî polîsan eşt  şaredarîye ser û serekê şaredare Mehmet Nûrî Guneş girewt û 7 serrî tewqîfkerde mend.

Mûrat Yîkît ê BDP'yî weçînitişanê cîyîyan yê serra 2014’î de reyêda bîne vera AKP û MHP’yî ser kewt. Îdir mîyanê bajaranê Kurdan ra yew bajaro ke şaredarîya ey bi destê qeyûmî nêameya tayînkerdene. AKP’yî ke Meclîsê Şaredarîye kerd xo dest, la Serekatîya Şaredarîye rê qeyûm tayîn nêkerd.

Şarê Îdirî wazeno weçînitişanê cîyîyan ê 31’ê Adare 2019’î de reyêda bîne ser bikewê. Eylem Çelîka Tirkeka Terekeme ya û Yaşar Akkûşo ke Kurd o, seba binkewtişê koalîsyonê AKP-MHP'yî Îdirî de dest bi xebatan kerd.

Ma namzedê HDP’yî yê Îdirî Eylem Çelîke û Yaşar Akkûşî nas bikerê...

EYLEM ÇELÎKE

Çelîke serra 1979 de qezaya Ahlate ya Bedlîsî de ameya dinya. Unîversîteya Trakyaye de beşê Têkilîyê bi Şarî, Unîversîteya Anatolîye de beşê Rayberîya Umûmîye ra bîye mezûne. Çelîke, bi tesîrê pîyê xo Têgêrayîşê Azadî nas kerd û wextê wendişî xo yê lîse û unîversîte de tewrê karê ciwananê wendekaran bîye. Çelîke zaf şîrketan de pisporîya fînansmane kerda, bekar a û yew kênaya xo ci esta.

YAŞAR AKKÛŞ

Akkûş mabênê keyeyo ke fikirîyayîşê xo çepgir o de ameyo dinya. Bi tesîrê pîyê xo yo ke serranê 1990î de îdarekerê HEP'yî yê bajarî bi. Ciwanîya xo de HEP'yî de dest bi karî kerd. Serra 1999’î de Unîversîteya Nîgdeyî de beşê Îdareyê herêmî wende û tîya de karê xo yê sîyasî dewam kerdî. Akkûş mîyanê HADEP û DEHAP'î de wezîfeyê Sekreterî û Serekîya Baskê Ciwanan bî. Mîyanê serranê 2011-2013’ine de berpirsîyarîya bajarî ya TZK-Kurdî kerde.