Dêrsim de tay hemwelatîyî vera qirkerdişê pezkovîyan vera seydwanan herêma Mutuyî ya mabênê Pilemurîye-Tarcanî de pê şîarê 'Seba koyan û pezkovîyan edalet' nobete gênê.

Wekîlanê HDPî Alîcan Onlu, Kemal Bulbul, temsîlkaranê HDPyî yê Dêrsimî nobetdarî zîyaret kerdî.

Heyetî zîyaret de waştişê nobetdaran ard ziwan.

Kemal Bulbulî zîyaret de qisey kerd û ard ziwan ke nobetdarî seba pawitişê pezkovîyan xîret kenê û vat: ''Ma venga şarê Dêrsimî û kesanê bînan danê ke pezkovîyî parçeyê xoza yê, bawerîya Dêrsimî de nê heywanî fîraz ê. Coka wa pêro îhaleyê qirkerdişî vinderê, wa kes destê xo nêdo xoza. Cade seydîya pezkovîyan biqeda. Ma venga dêrsimijan û hemwelatîyan danê ke wayîrê xoza û pezkovîyan vejîyê.''