Wekîlê YNKyî Zikrî Zêbarîyî Parlamentoya Herêma Kurdîstanî de qisey kerd bale ante hêrişanê îşxalî yê dewleta tirke ser û vera hukmatî nêrazîbîyayîşê xo mojna.

Zêbarîyî vat: ''Leşkerê tirkî cografyaya Kurdîstanî danê bombayan ver, 50 rojî yo hêrişê Kurdîstanî kenê, dewan kenê veng û merdiman şehîd kenê. Hukmatê Kurdîstanî vera hêrişan bêveng o. Ganî hukmat têbigêro, pê bêvengîye nêbeno.'' Nê vateyanê Zêbarîyî ser o serekê parlamento qiseykerdiş birna.

Zêbarîyî îfade kerd ke operasyonê teberê sînorî meseleya tewr pîle ya Başûrî ya û vat: ''Ewro semedê şarê Kurdîstanî budçe ra pîlêr mesele esta. Tirkîya herême de xo rê 70 merkezî awan kerdî. Ganî cade dewleta tirke herêmanê Kurdîstanê Federalî ra vejîya. Kurdîstan pê gonîya bi hezaran şehîdan ame awankerdene. Ganî Tirkîya cade Kurdîstanî ra vejîya.''