Wekîlanê HDPyî Murat Sarisaç û Tulaye Hatîmohullari yê ke perrê Colemêrgî yê Rayraşîyayîşê Colemêrgî de ca gênê qala armancê çalakîya xo kerde.

Wekîl Murat Sarisaçî îfade kerd ke bernameyo sîyasî yê HDPyî awankerdişê komarêka demokratîke û qanûno bingeyî yê azadîpawitişî yo. Sarisaçî vat: ''Destpêkerdişê rayraşîyayîşî ra nata hêzê asayîşî hêrişê ma kenê. Êlih de leşkerêkî gef wend û vat: 'Ma tîya de bidê şima pêroyînan ro la nêverdê şima şorê.' No têna her çi mojneno û îfade keno ke HDP çira rayîrî ra şono.  wextêk de ke şaran, partîyanê sîyasîyan û rêxistinanê komelê sivîlî de nefes nêmend, rayraşîyayîşê demokrasîyî seba înan do bibo nefesêk. Ma qerardar ê ke seba ke îqtîdarê faşîstî ra bixelisê, ma do destê xo bidê şarê xo û bi nê hawayî têkoşîn bikerê. Ma zananê ke Anqara de zî heman hêrişî pabeyê ma yê.''

Wekîla HDPyî Tulaye Hatîmogullari zî ard ziwan ke ê Colemêrgî ra heta Amedî pê coşêkê pîlî ameyî pêşwazîkerdene. Tulaye vat: ''Ma wazenê nefesêk bêrê welatê xo, çunke tede nefes nêmendo. Seke ma seba şerê giranî amadekarîye kenê hende hêrişê vera ma ameyî kerdene. Polîsan kuçeyan de ameybî cakerdene la reyna zî şarê ma sereyê xo nêard war û xîret kerd ke tewrê rayraşîyayîşê ma bibo. Ma reyna fam kerd ke rayîrê ma raşt o. Ma wazenê dermanêk û fedakarîyêk bidê nê welatî. Ma do têkoşînî û waştişê caardişê wezîfeyê xo yê HDPyî do biresnê Anqara.''