Xeylêk sîyasetmedarê kurdan ameyî destbendkerdene - Newe Bîye

Çarçeweya operasyonê qirkerdişê sîyasîyî de îdarekarê TJA û Komeleya Cinîyan a Rosa û îdarekarê HDP û DBPyî zî tede xeylêk sîyasetmedarî ameyî destbendkerdene.

Ewro saetanê rewî yê serê sibayî de çarçeweya operasyonê qirkerdişî yo ke merkezê ci Amed o de polîsan eşt keyeyan ser. Seretişan de keyeyan de bi saetan cigêrayîş ame kerdene û xeylêk aktîvîstê Têgêrayîşê Cinîyan ê Azadan (TJA) û îdarekar û endamê Komeleya Cinîyan a Rosa û îdarekarê HDP û DBPyî ameyî destbendkerdene.

Endamê ronayaxî yê Komeleya Cinîyan a Rosa Narîne Gezgor û Ayla Akat Ata, sereka Komeleya Cinîyan a Rosa Adalete Kaya û Îdarekara komele Fatma Gultkîn, aktîvîstê TJA Gulcîhane Şîmşek û Zelale Bîlgîn, hemsereko verên ê pêroyî yê Partîya Herêman ê Demokratîkan (DBP) Mehmet Arslan, endama Heyetê Rayberdişî yê Merkezî yê Partîya Demokratîke ya Şaran (HDP) Ozleme Gunduz, hemserekê HDPyî yê Yenîşehîrî Remzîye Sizici û Kasim Kaya, endamê HDPyî Mehmet Alî Altinkaynak, sîyasetmedaro kurdî Celal Yoldaş, Nazîle Tursun, endamê Meclîsê Şaredarîya Baglarî Huseyîn Harman û Gunele Aslan, endamê Meclîsê Şaredarîya Bajarê Pîlî ya Amedî Selîne Coşkun, endamê Meclîsê Şaredarîya Yenîşehîrî Nevrîye Çur û endama Meclîsê Mayanê Haştîye yê Amedî Havva Kiran.

Gezgora ke Riha de ameye destbendkerdene badê kotntorlê weşîye ameye berdene Mudirîya Asayîşî ya Amedî.

Yeno pawitene ke çarçeweya operasyonî destbedkerdişî bizêdîyê.