Wan de 3 rojan firtine qewimîya ke lezê ci saet de 35 kîlometre bi û de qeza û dewan de xesarê pîlî bîyî. Firtineyî  bi giranî qezayanê Qelqelî, Saray, Ebex û Elbakî rê xesarêko pîl da û cuya rojane rê tesîrêko xirab kerd.

Firtine de taxanê Sixkê, Serhat, Sehehaddîn Eyyubî û Hacibekîrî de banê keyeyan û noqtaya vindertişî ya mînîbusan firîyayî û ceyran zî ge ge şîyêne.

Qezaya Elbakî ya Wanî de dejê erzlerzê 22ê sibate hema zî dewam kenê. Xeymê mexdûranê erdlerzan zî firtine de cêra vejîyayî, heywenê înan telef bîyî û ceyranê xeym û konteyniran şîyî.

Taxa Yukari Koçkiranî ya qezaya Qelqelî de zî varan û firtineyî ra banê axurêkî rijîya û xeylêk heywanî telef bîyî. Merkezê qeza de zî banê xeylêk keyeyan rijîyayî.

Goreyê zanayîşan qezaya Ebexî de zî banê 200 keyeyan û 25 bînayan rijîyayî.

Taxa Sirimli ya Sarayî de banê xeylêk keyeyan rijîyayî, dêsê axurêkî xera bi. Banê keyeyêk kewt serê mînîbusa M. Tahîr Ozkaplanî û xesarêko pîl bi. Hemşaredarê Sarayî Şahabettîn Bîlmez o ke herinda ci de qeyûm ame wezîfedarkerdene vat ke Saray de zaf zerarî ameyî meydan û ê do derheqê babete de dewijan reyde qisey bikerê. Bîlmezî îfade kerd ke selahîyetdarî mesele pey goş kenê û dewijî xîret kenê ke pê îmkananê xo têbigêrê.