Erdlerzê Wanî yê sibate ra dima xeymî dîyabî dewijan. Ê wextî de wekîlê AKPyî yê Wanî Abdulhalat Avrasî seba mexdûranê erdlerzî vatbi: ''Ma do şorê, şima bi xo biewnê çareya xo.'' Prosesê vîrusê Korona ra zî dima rewşa mexdûranê erdlerzî giranêr bîye. Di rojan ra nata qezayan û merkezê Wanî de vaûvirike esta ke zaf tesîrê mexdûranê erdlerzî yê Elbakî kerd.

Vaûvirike de xeymê ke dîyabî mexdûran cêra vejîyayî û kewtî. Vaûvirike ra ceyran zî nêdîyeno xeyman û konteyniranê mexdûranê erdlerzî. Dewijan seba hetkarîye veng da.

Wekîla HDPyî ya Wanî Muazzeze Orhan derheqê rewşa mexdûran de zanayîşî dayî û vat: ''Tim dewan û waranê mexdûranê erdlerzî de meseleyî estê. Vaûvirika di rojan de xeymî bi temamî rijîyayî, zaf heywanî zî telef bîyî. Wextê erdlerzî de hetkarîyê partîya ma û ê aktîvîstan ameyî astengkerdene. Şarî pê îmkananê xo xo ca kerd. Vaûvirike de zerarêko pîl reaa mexdûran ser. Vaûvirike mojna ke karê înan senî zûrayîn ê.''

Muazzeze Orhan ard ziwan ke îqtîdarê AKPyî tim wazeno felaketan de şar muhtacê xo bikero coka şar neçare verdeno û îmkananê dewlete pêşkêşê înan nêkeno. Wekîle pare kerd ke dewijî rewşêka xirabe de yê. Ê gêrîyayî Mudirê Zîretî yê Wanî û ey zî vat: ''Ma nêeşkenê çîyêk bikerê.'' Muazzeze Orhan da zanayene ke nêzdîbîyayîşê dewlete wina yo.