Grevê vêşanîye yo bêdem-bêagêrayîş ê Nasir Yagizî yê hemverê tecrîdê serê Ocalanî roja xo ya 118’ine de dewam keno. Yagizî ard ziwan ke halê ê yê weşîye bîyo giran, dejê sereyî û problemê çiman zaf zor dano ê.

Grevê vêşanîye yo ke Temsîlkarîya HDP’yî ya Hewlêrî de yeno kerdene roja 116’ine de yo. Heman wextî de çalakîya hemwexte ya bêdem û biagêrayîşî bi grûba 58’ine dewam kena.

VILABÎYAYÎŞÊ ÇALAKÎYE HÊZ DANO MA

Yagizî derheqê halê xo de ANF’yî rê hayîdarîyî dayî. Yagizî ard ziwan ke çalakîya ê her ke şina hîna bena xurt û umîdê serkewtişî dana. Yagizî bale ante ke xurtbîyayîş û vilabîyayîşê çalakîye hîna zaf hêz danê ê û heme hemrayanê ê yê ke nê rayîrî ser o rayra şinê.

 ‘DEJÊ SEREYÎ Û PROBLEMÊ ÇIMÎ ZOR DANÊ MI’

Yagizî bale ante serê halê weşîya xo û vat: „Çende şino problemê min ê weşîye hîna benê giran. Problemê min ê hewnî, dejayîşê sereyî û problemê çiman zaf zor danê mi.“ Yagizî ard vîrî ke rixmê nê giranîya weşîye zî moral û coşê ê nêbeno kemî û heta no xoverdayîş hîna zaf moral dano ê.

Yagizî tewr peynî de vat ke qetî do serkewtiş virazîyo.

MEXMÛR

Grevê vêşanîye yo bêdem û biagêrayîş ê Kampa Multecîyan a Şehîd Rustem Cûdî ya Mexmûrî ke 16’ê Kanûn a 2018’î ra dest pêkerdo kewt roja xo ya 91’ine. Çalakî hetê grûba 31. ra amî dewrgirewtene.

Merasimê dewrgirewtişî de Mamoste Hesin Demîrî qisey kerd û şehîdê Helebçeyî bi vîr ardî û bale ante serê mucadeleyê şarê Kurdî yê seba şikitişê tecrîdî û pêresayîşê azadîye. Demîrî ard ziwan ke ê do heta serkewtişî mucadeleyî bidomnê.

Heman wextî de çalakîya endama Koordînasyonê Meclîsê Îştarî Fedîle Toke zî Mexmûr de ke 20’ê Çele ra dest pêkerdebî roja xo ya 56’ine de bi qerardarîye dewam kena.

SILÊMANÎ

Grevê vêşanîye yo ke Komeleya Karkeranê Mezopotamya Silêmanî de seba wedartişê tecrîdê serê Rayberê Şarê Kurdî Abdullah Ocalanî amebi destpêkerdene roja xo ya 92’ine de ke hetê grûba 47’ine ya cinîyan ra ameyêne dewamkerdene, ame dewrgirewtene. Grûbe 4 cinîyan ê ciwanan ke Başûr û Rojakewtena Kurdistanî ra yê ameyêne pê.

GREVÎ BAŞÛRÊ KURDISTANÎ DE VILA BENÊ

Heman wextî de Fatma Ahmede ya ke dewa Tatan a qezaya Pênciwênî ra ya nizdê hewteyêk o ke dest bi çalakîye kerdo. A kîşta cinîyanê ciwanan de çalakîya xo domnena.

Çalakîya grevê vêşanîye yo bêdem û bêagêrayîş a Herêm Mehmûdî roja 20’ine de dewam kena. Heman wextî de çalakîya Şeyma Ednan a ke seba mengêk kewtebî grev zî roja 13’ine de ya.

Endama Têgêrayîşê Azadî yê Cimatê Kurdistanî (Têgerayîşo Azad) Ronak Mecîde zî seba paştîdayîşê grevî 14’ê Adare ra dest bi grevê vêşanîye yê seba hewteyêk kerdibi. Çalakîya Ronak Mecîde roja 3’ine de ya.