Hemsereka Konseya Rayberdişî ya KCKyî Besê Hozat ANFyî rê rojdem ercna. Beşo verên ê roportajê Hozate wina yo:

''Îmrali de sîstemê îşkenceyî esto. Çaresernêkerdişê meseleya kurdan, polîtîkaya înkar û çinkerdişî bi sîstemê tecrîdî yê vera Rayber Apoyî yenê caardene. Nika têkilîya Rayber Apoyî ya bi teberî qetî çin a, o binê tecrîdêkê mutlaqî de yo. Sîstemo hegemonîk xîret keno ke Rayber Apoyî werte ra wedarno û Têgêrayîşê Azadîye tasfîye bikero. Hêrişê îşxalî yê vera Başûrê Kurdîstanî zî parçeyêkê Komployê Mîyanneteweyî yo. 22 serrî yo Îmrali de huqûq û edalet nênê caardene. 

Şarê Tirkîya eke vera tecrîdê Îmraliyî wurzê payan ser tecrîd qedîyeno. Heta ke no sîstemê tecrîdî nêqedîyo  huqûq, edalet, demokrasî, azadîye û têdûştîye nênê Tirkîya. Ganî pêro hunermend, şorişgêr, nuştox û şarê Tirkîya vera nê sîstemî vengê xo vejê, vera ci pîya têkoşîn bikerê. Xora bi serran o şarê kurdî vera tecrîdê Îmraliyî têkoşîn keno, Strasbourg de çalakîya nobeta azadîye keno. Armanco ma yo verên zî azadîya Rayberîye ya.

Dewleta tirke Zap, Metîna û Avaşîn de hêrişê Başûrê Kurdîstanî kena. Armancê dewleta tirke îşxalê Başûrî yo. Gerîlayî bi hawayêkê bêhempayî xo ver danê, derbanê giranan danê dişmenî ro. Dewleta tirke pê nê hêrişan hem wazena têgêrayîşê ma tasfîye bikera hem zî wazena temamîya Başûrî îşxal bikera. Hedefê înan de destvistişê Mûsil û Kerkûkî esto. Verê înan de tek astengîye PKK yo. 

Artêşa tirke vera xoverdayîşê gerîlayan de teng bîye coka gazê kîmyewî şuxilnena. PDK zî paştî û hetkarîye dano ney. Dewleta tirke verî ra wazena gerîlayî û pêşmergeyî têvera şer bikerê. Naye ra xîret kena ke PDK bi hawayêkê aktîfî tewra şerî bikera. Gerîlayê YJA-Starî Heftanîn, Metîna, avaşîn û Zap de hêzê tewr fedayî yê gerîlayan ê. Gerîlayê YJA-Starî çêrîye, rûmet û tewirê azadîye yê cinîyan ê kurdan temsîl kenê. Gerîlayê cinîyî dişmenî ra hesabê qirkerdişan persenê. Têkoşînê gerîlayan ra nêbîyêne dewleta tirke rew ra ser kewtêne û pêro kurdî qir kerdêne. Gerîlayî hêzê îdeolojîk, sîyasî û komelkî yê.

Çarenusê çar parçeyanê Kurdîstanî yew o.Vakur de vera kurdan qirkerdişê tewr pîlî yenê kerdene. Têkoşînê PKKyî ra nêbo statuyê Rojawan û Başûrî zî dekeweno binê tehlukeyî. Gerîlayî bi serran o Başûrê Kurdîstanî pawenê. Eke gerîlayî bin bikewê Başûr zî bin keweno. Dewleta tirke qeyî statuyê Başûrî raşta nêşinasna. Pawitişê gerîlayan seba şarê kurdî pawitişê estbîyayîşî û azadîye yo. Ma têna pê xoverdayîşê gerîlayan eşkenê teda, zorbazîye û qirkerdişî ra bixelisê. Ma venga pêro ciwananê kurdan danê ke vera hêrişanê îşxalî Kurdîstanî bipawê. Ciwanê kurdî wa wayîrê nê mîrasî, îradeyî vejîyê.

PDK paştî dano polîtîka û hêrişanê îşxalî yê dewleta tirke. Çunke PDK zî wazeno PKK bêro tasfîyekerdene. Mabênê PDK û dewleta tirke de peymanê gemarinî estê. Yeno îdîakerdene ke petrolê Kerkûkî dîyeno Tirkîya. PDK wazeno pêro Başûrî bi sereyê xo bivisno destî. Dewleta tirke wazena Başûr de ca biba. PDKyî çend reyî ard ziwan ke Tirkîya îşxalker nîya, meseleya Tirkîya bi kurdan çin a bi PKKyî esta. PDK tim dormeyê gerîlayan gêno, îstîxbarat dano Tirkîya. Eşkerayo ke PDKyî soz dayo Tirkîya ke bikewo şerî. La semedo ke şar nêrazîbîyayîşê xo nêmojno PDK gêreno zemînêkê meşrûyî. Eke ma bi hîsgerî tênêgêrayêne mabênê kurdan de şer vejîyayêne. PDKyî planê dewleta tirke ser o waşt debikewo Çemço. Gama winasêne şerî dana destpêkerdene û zerarêkê pîlî dana kurdan û destkewteyanê ma. Ganî PDK nê gamanê provakatîfan war verdo.

PKK 40 serrî yo Başûr de yo. PDKyî heta nika estbîyayîşê PKKyî xo rê mesele nêkerdbi ewro çira keno? Başûr de xeylêk gerîlayê ma şehîd bîuî. Wextê hêrişanê DAÎŞî de gerîlayan seba Başûrî şer kerd. Dewleta tirke vera gerîlayan hêrişê îşxalî kena la çira PDK beno parçeyê nê hêrişan? PDK Tirkîya sey îşxalkerî nêvîneno la têgêrayîşê ma sey îşxalkerî vîneno. Mesûd Barzanîyî vatêne şerê way û birayan heram o, ewro se bî nê vateyî? Çira ewro PDK wazeno vera PKKyî şer bikero. Eke yewîya kurdan biameyêne awankerdene dewleta tirke nêeşkayêne Rojawanî îşxal bikera. Heqê partîyêka kurdan çin o ke tewrê xîretê tasfîyeya PKKyî bibo. 

Wextê xîretanê Heyetê Haştîye de rîyo raştikên ê PDKyî vejîya werte. Nê heyetî waştêne hêrişanê Tirkîya vindarno û şerê zereyî yê kurdan asteng bikero. Dima nê heyetî nameyê xo sey Înîsîyatîfê Kurdîstanî Bipawê îlan kerd. No înîsîyatîf zaf girîng o. Sereberzî ya ke kurdî wayîrê dostanê winasênan ê. Reyna eşkera bi ke bi taybetî Almanya welatê Ewropa paştî danê hêrişanê dewleta tirke. Dostê ma vera îşxalî xebatanê erjîyayeyan kenê, ma înan rê serkewtiş wazenê.

Prosesê nê hêrişan de çar parçeyanê Kurdîstanî de şarê ma paştdayîşê xo yê bi gerîlayan û PKKyî ard ziwan. Reyna şarê ma yê Başûrî zî bi zelalî eşkera kerd ke ê şerê zereyî yê kurdan nêwazenê. PDKyî ra ber pêro partî û dezgehê Başûrî zî sey şarî fikirîyenê. Ganî şar û partîyê Başûrî bêters û xurtî ra hêrişanê Tirkîya û tedaya PDKyî protesto bikerê. Ganî cinîyê kurdî zî welat de û teberê welatî de nêrazîbîyayîşê xo bi xurtî bîyarê ziwan. Eke cinîyê kurdî tewirê xo bimojnê hînî çarenusê Kurdîstanî vurîyeno. Ganî çar parçeyanê Kurdîstanî de û teberê welayî de vera faşîzm, îşxal û şerê zereyê kurdan bi se hezaran kesî vejîyê waran. Hunermend û roşnvîranê kurdan heta nika seba yewîya kurdan zaf xîret kerd. Menga hezîrane de heyetêkê hunermendan şi Başûr, pêvînayîşî kerdî û eşkerayîyî dayî. Nê xîretî erjîyaye yê la ganî bizêdîyê. Ganî pêro hunermend, roşnvîr, dezgeh û rêxistinê kurdan bi taybetî ê Başûrî tewirê xo vera îşxalî binî ra bimojnê.

Awankerdişê yewîya neteweyîye mesuldarîyêka tarîxî ya. Rayber Apoyî zî seba ney veng dabi û waştbi ke mabênê PDK û PKKyî de protokolê 1982î bêro newekerdene. Nê prosesî de hêrişê dişmenî resayî asta tewr berze gureyo tewr lezabez awankerdişê yewîya neteweyî yo. Şarê kurdî wazeno kongreya neteweyîye cade bêra pêser. Ganî na kongre bêra kerdene û tede têna partîyê sîyasî nê rayaumûmîya kurdan, dezgeh û rêxistinê şarî zî ca bigêrê. Kurdî ganî meseleyanê xo pê dîyalogan çareser bikerê û îşxalî meşrû nêkerê. Ganî partîyê kurdî her çî ra verî menfaatanê şarî bifikîrê û bîyarê ca. Yewîya kurdan ganî binê îpotekê yew partîye de nêba. Nika seba caardişê yewîya neteweyîye her wextî ra zêdêr îmkanî û zemînêk estê. Na çarçewe de ma reyna venga şarê xo, roşnvîr û hunermendanê kurdan danê ke seba yewîya neteweyîye zêdêr bixebitê, vera hîşmendî û tewirê dûştê yewîye ganî tedaya rayaumûmîye awan bikerê.''