Endamê HDP’yî Nasir Yagiz seba ke tecrîdê serê Rayberê Şarê Kurdî Abdullah Ocalanî bêro wedaritene,  Hewlêr de 71 rojî yo grevê vêşanîye yê bêdem û bêdore de yo.

Hetê bînî ra Hewlêr de grevê bêdem ê bidore de grûba 34’ine nobete dewr girewte. 7 kesê Vakurî yê ke Başurê Kurdistanî de manenê grevê vêşanîye dewr girewt.

Vatoxa HDP‘yî ya Hewlêrî Muzeyyen Guneşe derheqê Yagizî de yew beyanat da û va Nasir Yagiz hetê weşîye ra her ke şono beno xirab.

Qaso ke Guneşe vana, Yagiz hêzê ra kewto û êdî nêeşkeno çîyê awîyî zî bigîro. Reyna bîhna Yagizî miçiqîna, nêeşkeno helm bigîro û nêeşkeno tayê çîyan bîyaro rê xo vîrî.

Guneşe derheqê Yagizî de wina qisey kerd:

“Seba ke zaf bîyo zeîf, nêeşkeno ronîşo û rawirzo. Dejê madeyî û sereyî zor danê ey. Ge-ge dejê sereyî ver rîyê ey maseno. Rewşa ci ya weşîye bîya girane û êdî nêeşkeno çîyê awîyî zî bişimo. Yew roje de 3-4 dolimî virêceno ra. Ma bi zorî awî danîme ci, Şewdir wexto ke heşar beno nêeşkeno game bierzo. Rewşa xo êdî zaf giran a. La hetê moral û motîvasyonî ra hêza xo ca de ya û zîyaretê şarî ra zerrîweş o“