Yewinanê Xoverdayîşê Şingalî (YBŞ) serrgêra qirkerdişê Şingalî de eşkerayîyêka nuştekîye weşanaye.

Eşkerayîya YBŞyî de nê çîyî ameyî parekerdene:
''Ma sere de şehîdanê xo yê ke bîyî sembolê rûmet û kerametê şarê xo bi mînet û hûrmetî yad kenê. Ma ked û bedelanê şerwananê azadîye rê selam danê.

Ma do serrgêra 6. ya Fermanê 73. de rayberîya şehîd Mam Zekî, Berxwedan, Zerdeşt, Pîr Hemîd, Nazê Naîf û Berîvanan de têkoşînê xo do pîlêr bikerê.

Pêro şarê ma û rayaumûmîye dî ke netîceya bêxopawitişî senîn a. Seba ke PDKyî vat ê do ma bipawê ma hewce nêdî ke pawitişê xo awan bikerê. La pêro dinya dî ke kamî ma pawitişî û bedelî dayî. 

Şarê ma nê fermanî ra dersê pîlî vetî. Ganî şarê ma bizano ke ancax pê paradîgmaya neteweyê demokratîkî cewabo tewr raşt dîyeno ferman û qirkerdişan. 

Nê 6 serran de hêzanê ma YBŞ û YJŞyî seba aramî û azadîya Şingalî rolêko pîl kay kerd. Heta nika bi hezaran keyeyê êzidîyî agêrayî Şingal. No tarîxê ma de zî reya verêne dîyeno. Tîya de baro pîl ê şehîdanê ma yo. Ma sayê têkoşînê Mam Zekî, Berxwedan, Dilgeş, Berîvane, Nûjiyane, Nazê Nayîf, Zerdeşt û 400 şehîdan de bîyî wayîrê tay destkewteyan.

Dewleta tirke ya faşîsta ke 73 fermanan ra nêeşka netîceyêke bigêra ewro zî hêrişê Şingalî kena. Ma senî ke Fermanê 73. kerd pûç bi heman hewayî pê têkoşîn û xuverdayîşê şehîdanê xo ma do nê hêrişan zî pûç bikerê.

Hîşmendîya faşîste ya AKP-MHPyî ya ke Ayasofya de xîlafetê xo îlan kerd, hema zî xeyalê xo yê Mîsak-i Mîllîyî ra fek vera nêdayî. Na hîşmendîye seba ma û şaranê bînan tehluke ya. La ma do hêzanê YBŞ û YJŞyî reyde cewabanê hêrişanê înan bidê.

Ma venga şarê xo û herême danê ke ma dormeyê YBŞ û YJŞyî de bêrê pêser û verê hêrişanê dişmenan bigêrê û azadîya xo bipawê.''