Yewîya Ciwananê Welatperweran ê Kurdîstanî (YCWK) bi eşkerayîyêka nuştekîye ronîyayîşê xo îlan kerd û bi 13 madeyan xeta xo ya têkoşînî û armancê xo pare kerdî. 

Eşkerayîye de bale ameye antene raştîya Kurdîstanî û qirkerdişê vera kurdan ser û ame parekerdene ke dewleta tirke teyna wazena kurdan qir bikera. Eşkerayîye de ame vîrvistene ke Rayberê Şarê Kurdî Abdullah Ocalanî kurdan de hişmendîyêke viraşta û kurdî qirkerdişî ra xelisnayê. 

Eşkerayîya ciwanan de dîya zanayene ke dewleta tirke bi taybetî 8 serranê peyênan de bi giranî hêrişê kurdan kena û tecrîdê Îmraliyî vera kena giranêr. 

YCWKyî eşkerayîya xo de vat: ''Dewleta tirke ya faşîste pê polîtîkayanê şerê taybetî ciwanan kena hedf û kena ke ciwanan pê bêkarîye û xizanîye terbîye bikera. Reyna vera ciwanan hêrişê kulturelî zî est ê. Dewleta tirke kena ke ciwananê kurdan kulturê înan ra dûrî bivisna û bi nê hawayî ciwanan dejenera bikera.

Têkoşînê Rayber Apoyî yê 50 serrî ciwananê kurdan de roşnîyêka pîle viraşte. Hêrişê dişmenî qetî pê ciwananê Apogîran nêeşkayî. Nê prosesî de zî ciwanî ganî her wextî ra zêdeyêr bi rêxistinî, perwerdebîyayeyî û aktîfî tewrê têkoşînî bibê. Mîrasê ciwananê Apogîran nê fermanî dano.

Ma sey ciwananê şorişgêran seba ke erkê xo yê serkêşîye û servistişî bikerê, bi ruhê Alî Çîçekî ronîyayîşê YCWKyî îlan kenê û ney sere de Rayber Apoyî pêro şarê ma û ciwanan rê fîraz kenê.

Xeta ma ya têkoşînî û armancê ma wina yê:

1-Esasê xeta ma ya têkoşînî parçekerdişê tecrîdê Îmraliyî û azadkerdişê Rayber Apoyî yo.

2-Seba ke rejîmê AKP-MHPyî birijîyo ma do têkoşînê ciwanan aver berê û serkêşîya ci bikerê.

3-Ma do pêro ciwanan rêxistin bikerê û cepheyê antî-faşîstî de bîyarê ca.

4-Ma do pêro ciwanan bi felsefeya Rayber Apoyî perwerde bikerê û nînan bikerê ciwananê rêxistinkerdeyan.

5-Ma do cinîyan ê ciwanan sey serkêşanê YCWKyî bivînê û vera polîtîkayanê şerê taybetî yê vera cinîyan seferber bibê.

6-Ma do pêro wendekaranê lîse û zanîngehan seferber bikerê.

7-Ma do qirkerdişê kulturelî teşhîr bikerê, red bikerê û vera ney kulturê xo yê esasî aver berê.

8-Ma do bi têkoşînê şorişgêrî hêrişanê dişmenî yê sey fuhuş, tîryakî û ajanîye ciwanan rayîrê gemarinî ra bixelisnê.

9-zulm ça de bo ma do uca de koma xo ya rêxistinîye awan bikerê.

10-Ma do vera rejîmê faşîstî têkoşînî esas bikerê û xeta xoverdayîşî serdest bikerê.

11-Ma do vera hêrişanê serê şarê ma û erjanê ma yê têkoşînî bi ruhê qesasî cewab bidê, bi hawayêkê bêmabênî seferber bibê.

12-Ma do bi felsefeya 'Hêzo tewr pîl şaro rêxistinkerde yo' serewedaritişanê şarî aver berê û serkêşîya nînan bikerê.

13-Ma do muxbîr, ajan û hemkaran ra hesab bipersê.

Ma rejîmê dewleta tirke yê faşîstî rê vanê ke wehşet û barbarîya şima pîl ê la şima zî do pîlîya xoverdayîşê ma bivînê. 

Ma venga pêro ciwananê Vakurê Kurdîstanî û Tirkîya danê ke binê sîwana YCWKyî de bêrê pêser, xo rêxistin bikerê û bi coşî tewrê têkoşînî bikerê ke ma bi rûmetê xoverdayoxan biciwîyê.''