Fermandarîya Qerargehê Merkezî ya YJA-Starî bi eşkerayîyêke Hemleya 15ê Tebaxe fîraz kerde. Eşkerayîye wina ya:

''Ma serrgêra 39. ya Hemleya Gandarbîyayîşî ya 15ê Tebaxe fîraz kenê ke şarê Kurdîstanî qirkerdişî ra xelisna, hişmendîya kurdan aver berde. Ma şexsê Fermandar Egîdî de pêro şehîdanê ma bi rêzî û minetî yad kenê. Ma sere de nê roşanê Rayber Apoyî, roşanê pêro şarê ma û embazanê ma yê gerîlayan fîraz kenê.

Serkêşîya Fermandar Egîdî de Hemleya 15ê Tebaxe vera kolonyalîzm, sîstemê serdestîya camêrdan û faşîzm guleyo verên bi û teyna qederê kurdan ney qederê pêro şaranê xoverdayoxan vurna. Nê guleyê verênî dima ke çeka Fermandar Egîdî ra vejîya kurdî gandar kerdî û verê qirkerdişan girewt. Ma ewro pêro serkewtiş û destkewteyanê xo xêrê na hemle ra vistî destî. Hemleya 15ê Tebaxe yew destanê xoverdayîşî yo û mîlad o. Hemleya 15ê Tebaxe çalakîyêka normale nêbîye û na çalakîya hemleya azadîye netîceya ercnayîşanê Rayber Apoyî, kadroyanê serkêşan û fermandaran de ameye kerdene. Na hemle hetê stratejî û taktîkan ra xeta ma ya serkewtişê leşkerî dîyar kerde, terzê pirodayîşî yê gerîlayan dîyar kerd. Hemleya 15ê Tebaxe serewedaritişêko modern û xerîtaya pêro kurdanê rûmetênan û xoverdayoxan a.

Hemleya 15ê Tebaxe reyde bingeyê artêşbîyayîşê cinîyan eşt, têkoşînê xopawitişê cinîyan da destpêkerdene. Eke Hemleya 15ê Tebaxe nêameyêne kerdene ewro ne cinîyê gerîlayî ne zî têkoşînê cinîyan est bîyayêne. Eke ma ewro sey gerîlayanê YJA-Starî Serhedî ra heta Zapî pêser derban danê artêşa tirke ya îşxalkere ro û serkêşîya şarî kenê nê qewimîyayîşî xêrê Rayber Apoyî û Hemleya 15ê Tebaxe ra yê. Coka ma sey cinîyan ewro wexto ke koyan de şer kenê zanenê ke deryndarê kamî yê û ma bi nê hawayî tim nê vîrê têkoşînî gandar verdenê.

Nê esasî ser o Hemleya 15ê Tebaxe mojna ma ke ma senî eşkenê bidê sîstemê faşîstî ro û qesasê dejanê tarîxîyan senî bigêrê. Hemleya 15ê Tebaxe dîyar kerd ke ma senî xeta xopawitişî ya meşrûye, rûmet, namus û nasnameyê xo bipawê. Ewro serrgêra 39. ya hemle de têkoşînê ma resayo lewe. Ma koyan de vera artêşa tirke xoverdayîşêkê bêhempayî kenê. Embazê ma sere de Herêmanê Pawitişî yê Medya û Vakurê Kurdîstanî de her ca de xeta leşkerî ya Fermandar Egîdî de serkewtişanê pîlan visnenê destî. Artêşa fedayîyan a ke artêşa tirke vatêne 'ma do înan çend rojan de biqedînê' ewro verê na arteşe de astengêka tewr pîl a. Ewro ma sey gerîlayanê Rayber Apoyî benê Egîd û Zîlane. Ma bi ruhê fermandaranê xo yê serkêşan her roje hîna zaf nêzdîyê serfîrazîye benê. 

Ma serrgêra 39. ya hemle mewzîyanê şerî de pêşwazî kenê. Ma soz danê ke qetî na hemleya xoverdayîşî bi serfîrazîya mutleqe netîce bikerê. Ma do bi hêzê manewî yê şehîdanê ma, hêzê manewî yê Rayber Apoyî û bi hişmendî hîna zaf bidê dişmenî ro û xeta serkewtişî bîyarê ca. Nê esasî ser o ma sere de ê Rayber Apoyî Roşanê Gandarbîyayîşî yê pêro gerîlayan, embazan û şaranê Rojhelatê Mîyanênî fîraz kenê.''