Dezgehê Îstîxbaratê YNKyî (Zanyarî)  da pêhesnayene ke înan ke hetê dewleta tirke ra di rojanê peyênan de Silêmanî de hêrişî kerdî ameyî destbendkerdene.

Îdareyê Pêroyî yê Yewina Antî Terorî yê YNKyî zî da zanayene ke ê do rojanê verê ma de zanayîşanê bitesîr û muhîman rayapêrîye reyde  pare bikerê. La dîya zanayene ke keso ke ameyo tepiştene ey ke hêrişê karkero ke Vakurê Kurdîstanî ra ameyo Ferhat Bariş Konduyî kerd o yo. Qetilkarê Endamê Komîteya Keyeyanê Şehîdan a PKKyî Yasîn Bulut (Şukrî Serhed) hema nêameyî tepiştene.

Derheqê hêrişan de Dezgehê Îstîxbaratê YNKyî (Zanyarî)  û Tîmê Yewina Antî Terorî yê YNKyî  ra eşkerayîyî ameyî. Tîmê Antî Terorî vat destê înan de derheqê hêrişan de belgeyê muhîmî estê û ê do demo nêzdî de detayanê înan rayapêroye reyde pare bikerê.

Berpirsîyarê Zanyarî Ejî Emînî ewro serê sibayî hesabê xo yê Feebookî da eşnawitene ke di hêrişkaranê ke rojanê peyênan de Silêmanî de hêrişî kerdî ameyî tepiştene û vat ê do demo kilm de derheqê hêrişkaran de zanayîşo hîra bidê

Ewro eşkerayîya ke bi nameyê Zanyarî û Asayîşê Silêmanî ameyî dayene de zî ame vatene ke kesê ke 16 û 17ê êlule de hêrişî kerd, hêrişî têna bi xo kerdî.

Eşkerayîya fermî wina bo zî tay çimeyanê ke nameyê xo nêda vat hêrişê zafê xeylêk kesan ra ameyî kerdene. Reyna goreyê eynî çimeyan keso ke ame tepiştene ke hêrişê Ferhat Bariş Konduyî kerd o yo. Qetilkarê Yasîn Bulut (Şukrî Serhed) hema nêameyî tepiştene. Goreyê zanayîşanê ke ameyî girewtene înanê ke hêrişê Yasînî Bulutî kerd 4 kesî bî, înan ra yew çekdar bi ê bînan dorme de pawetene. Badê hêrişî hêrişkarî niştê wesayîtê tîpê Toyoya û remayî.