Endamê Dîwanê Serekîye yê YNKyî Salar Mehmûdî eşkerayîyêke daye çapemenîye û dima zî cewab da persanê rojnamegeran. 

Salar Mehmûdî eşkerayîye de hişyar kerd ke dormeyê Kerkûk û Germîyanî de ''komê terorîstî'' cabîyê û vat: ''Çend komê terorîstî est ê ke dormeyê Germîyanî de, nêzdîyê Selaheddîn û Kerkûkî de cabîyî. Ganî hêzê asayîşî amade bibê. Çunke nê komê terorîstî do zerar bidê asayîşê şar û herême. Ma her roje eşnawenê ke nê terorîstî adir verdenê baxçeyanê şarî.''

Mehmûdî ard ziwan ke ê sey YNKyî isrardar ê ke Dîyala, Selahedîn û Kerkûk de hukmatê herêmîyî wa bêrê awankerdene. Mehmûdîyî venga PDKyî da ke wa seba ney YNKyî reyde têbigêro. Mehmûdî vat: ''Ganî Kerkûk sey erdê kurdan bêro namekerdene.''

Mehmûdî bale ante weçînayîşan ser û vat: ''Taloqkerdişê weçînayîşan gamêka raşt nêbi. Ganî cade weçînayîşî bêrê kerdene. Ma seba demokrasîyê herême û aramîya şarê ma çi bikewo bara ma do bikerê.''