Hemsereka Partîya Cuya Azade ya Kurdîstanî (PJAK( Zîlane Vejîn derheqê şerê Kurdîstanî, rejîmê Îranî, weçînayîşê serekkomarîye yê Îranî ANFyî rê ercnayî. Qiseykerdişê Zîlane ra beşêk wina yo:

''Ez şexsê embaze Zeynebe Kinaci (Zîlane) û Letîfe Selamet de pêro şehîdanê menga hezîrane bi rêzdarî yad kena. Ma do rayîra şehîdan ra şorê û pê ruhê Zîlane qesasê şehîdan bigêrê.

Rojhelatê Mîyanênî de şerê pîlî, krîzê pîlî qewimîyenê ke rewşa Sûrîye, Lîbya, Iraq û Tirkîya mîsalê ney ê. Şerê Rojhelatê Mîyanênî tewr zaf Kurdîstan de gir beno. Têgêrayîşê Azadîye yê Kurdîstanî serranê peyênan de destkewteyê pîlî vistî destî. La hêzê hegemonîk û serwerî seba çinkerdişê nê destkewteyan hê têgêrenê. Dewleta tirke ya faşîste nika vera kurdan şerêkê pîlî kena. No şer têna vera PKKyî nê vera pêro kurdan o. 

Dewleta tirke vera gerîlayan pê pêro îmkan û teknîkanê xo hêrişan kena. Ganî kurdî nê prosesî de bi xurtî wayîrê gerîlayanê azadîye vejîyê. Dewleta tirke hêrişê Rojawan, Şingal, Mexmûr û hêrişê gerîlayanê ma zî kena. Çend rojî verî di gerîlayê YRKyî şehîd bîyî. Qirkerdişê Denîz Poyraz zî asta nê şerî mojnena. Reyna dewaya qefilnayîşê HDPyî zî parçeyêkê nê şer û qirkerdişî yo.

PDK nê şerî de hetkarî û terergîrîya dişmenî keno. No kerdişê PDKyî kurdan rê fayde nêkeno, zerar dano kurdan. No şer şerê rûmet û azadîye, şerê estbîyayîşê azadî yo.PDK seba şerê zereyî yê kurdan çend gamî eştî. La rayaumûmîya kurdan, roşnvîr û hunermendan vera ci tewirê xo mojna. PKKyî zî vat ê şerê zereyî nêwazenê. Ma zî sey PJAKî qetî şerê zereyî yê kurdan nêwazenê.

Rojhelatê Kurdîstanî de ciwanî her roje tewrê gerîlayan benê. Şarê Rojhelatê Kurdîstanî bi xurtî wayîrê şehîdanê xo û gerîlayanê xo vejîyeno. Şarê ma yo welatperwer û şorişgêrê ma kenê ke verê îşxalî bigêrê.

Nê weçînayîşê Îranî de se ra 60 merdimî tewrê weçînayîşî nêbîyî. Seke zanîyeno Îbrahîm Reîsî sey serekkomarî ame weçînayene ke o zî teregîranê Elî Xameneyî ra yew bi. Reîsîyî ra dima rewşa Îranî do hîna xirab biba. Vizêrê Îbrahîm Reîsî de kiştiş û qirkerdişî estê. 

Rojhelatê Kurdîstanî no weçînayîş boykot kerd. Yew meşrûtîyetê rejîmê Îranî Rojhelatê Kurdîstanî de çin o, nêmendo. Ganî rejîm na raştîye bivîno. No sîstem pê têkoşînê komelî yê Îran û Rojhelatî eşkeno bivurîyo. Wa her kes hewteyêk karî war verde, vejîye meydanan, rawurze, sere wedarne hîmî rejîm neçare maneno ke bivurîyo.

Cinîyî na babete de rayber ê. Îran de cinîyî sey însanan nênê dîyene û pêro heqê înan yenê binpaykerdene. Cinîyê Rojhelatê Kurdîstanî çêr û wayîrîrade yê. Eke wurzê payan ser kes nêeşkeno verê înan bigêro. Beşê bînî yê komelî zî ganî hînî vera rejîmî binê yew û vera sîstemî bi hawayêkê radîkalî vinderê.

Şarê Îranî her wextî ra zêdêr wayîrê îmkanan ê. Eke şarî pê fikrê azadîye, sosyalîzm û demokrasî wurzê payan ser eşkenê şorişê azadîye ser bivisnê. Eke şarê kurdî û şarê bînî yê Îranî bibê yew eşkenê ser bikewê.''