Komîteya Paştdayîşê Keyeyanê Şehîdan a PKKyî pê eşkerayîyêka nuştekîye Roşanê Qurbanî fîraz kerd. 

Eşkerayîya PKKyî wina ya:

''Şexsê şehîdanê pîlan ê 14ê Temmuze de ke pê bedenê xo vera faşîzm, teslîmîyet û îxanetî vindertî xeta fedayîye û çêrîye bingeyê têkoşînê azadî yo. Ewro embaz Rûstem Cûdî wayîrê nê mîrasî vejîya û alaya Bêrîtane, Vîyane û Zîlanan berz kerde û derbêka pîle daye hîşmendîya îşxalkeran û xeta xîyanetî ro. Ma şehîdanê Cengê Rûmetî yê Heftanînî û pêro şehîdanê Şorişî yad kenê, rîyê xo verê înan de anê war û soz danê ke ma do armanc û xeyalanê înan bîyarê ca.

PKK tim pê raştîya şehîdan xo kerd pîl û prosesanê tewr zoran de zî pê xoverdayîşê şehîdan serkewtişî vistî destî. Na raştîye tim bîyî wesîleya averşîyayîşanê neweyan. Her şehîd , her gor game bi game Têgêrayîşê ma aver berd. Wexto ke şehîdêk/e canê xo feda kerd her rey zêdêr ciwan û cinîyan verê xo da koyan. Ê ewladê şarê ma yê erjîyayî yê ke pê paradîgama û felsefeya Rayber Apoyî benê çêr û fedayî ke têkoşînê azadîye berz kenê.

Ma prosesêk de yê ke her cayê Kurdîstanî de xoverdayîşê bêhempayî yê vera îşxal, faşîzm û teslîmîyetî yenê kerdene. Ma bi nê hawayî Roşanê Qurbanî pêşwazî kenê. Roşanê Qurbanî sembolê têdûştî, azadî û yewîye yo. Rojhelatê Mîyanênî de bi taybetî Kurdîstan de ma pê hêrişanê faşîzanan ê AKP-MHPyî û pê xoverdayîşê şarê xo roşan pêşwazî kenê. Xora faşîzm wazeno rojanê tewr rindan ê şarê ma gemarin bikero. Vera nê hêrişan wayîrvejîyayîşê şehîdan zaf girîng o. Zîyaretê şehîdgehan, yadkerdişê şehîdanê ma yê çêran bi sereyê xo cewabo tewr pîl ê vera îqtîdar û faşîzmî yo.

Nê esasî ser o ma sey Komîteya Paştdayîşê Keyeyanê Şehîdan a PKKyî şexsê xoverdayoxanê Cengê Heftanînî de ke heta peyêne xo ver da û tewrê bêmergan bîyî, pêro şehîdanê şorişî yad kenê û ma sozê xo dibare kenê. Ma Roşanê Qurbanî yê keyeyanê şehîdan, şarê kurdî û azadîwaştoxan û Roşanê Qurbanî yê alemê îslamî fîraz kenê.''