Rojawanê Kurdîstanî de serkêşîya Têgêrayîşê Ciwananê Şorişgêran û Cinîyan ê Ciwanan de ciwanan qedexeyê pêvînayîşî yê vera Rayberê Şarê Kurdî Abdullah Ocalanî ame protestokerdene.

Kobanê de ciwanan rayraşîyayîşêko girseyî kerd. Rayraşîyayîşî ra dima Hemserekê Meclîsê Ciwanan û Sporî yê Kantonê Firatî Avaşîn Mistoyî îfade kerd ke bi tecrîdî dewleta tirke do nêeşka verê vilabîyayîşê fikranê Ocalanî bigêra.

Dêra Zorê de ciwanan bi meşaleyan rayraşîyayîş kerd û dima eşkerayîye daye. Eşkerayîye de venga pêro ciwanan dîya ke seba azadîya Rayberê Şarê Kurdî, rijnayîşê faşîzmî û caardişê komelê demokratîkî têkoşînî pîlêr bikerê.

Reqa de Têgêrayîşê Ciwanan ê Şorişgêran ê Sûrîye vera tecrîdî rayraşîyayîş kerd û dima bi eşkerayîyêke da zanayene ke heta azadîya Abdullah Ocalanî ciwanî do meydanan de bibê.

Minbic de zî rayraşîyayîşê bi meşaleyan ame kerdene. Hemserekê Têgêrayîşê Ciwananê Şorişgêran ê Minbicî Hisên Begarîyî çalakîye de qedexeyê pêvînayîşî şermezar kerd û vat ke bi xoverdayîşî dêsê Îmraliyî do bêrê şiknayene.