Banê Êzidîyan ê Hesekê  cinîyê bi nameyê Serab Nayîf Îsa, Leyla Xelef Filîde, Ezîze Şemo Xelefe, Hedîyê Elî Hecî û Qismet Salîh Mihemede û domano 13 serre Qasim Evdo yê ke  hêzanê QSD’yî çeteyanê DAÎŞ’î ra xelisnayî teslîmê Meclîsê Şengalî û Weqfê Cinîyan ê Êzidîyan kerdî.

Îdarekarê Banê Êzidîyan ê Herêma Cizîrî Mehmûd Reşoyî hêzanê ke cinî û domanan xelisnenê rê spas kerd. Hetkara serekîye ya Weqfê Cinîyan ê Êzidîyan  Rîham Hesene zî hêzê ke  cinîyan û domanan xelisnenê û resnenê keyeyanê înan, nînan rê spas kerd. Hemserekê Meclîsê Kantonê Hesekê Ebdilxenî Osoyî zî ard ziwan ke heta xelisnayişê heme Êzidîyan do xebatî dewam bikerê.