Meclîsê Pêroyî yê Îdareyê Xoserî yê Vakur û Rojakewtena Sûrîye seba qanûnê Hêzê Gureyê Xopawitişî bigêrê xo dest awanîya xo ya ke merkezê ci Eyn Îsa yo de kombîyayîşêk viraşt. Hemserekê Îdareyê Xoserî Ferîd Atê û Sîham Qeyro, hemserekê Meclîsê Îdareyê Xoserî Abid Hamid el Hihbaş, hemserekê Buroyê Pawitişî Cîhan Ehmede û Zêdan el-Asî, fermandarê pêroyî yê QSD’yî Mezlûm Ebdî û endamê Meclîsê Pêroyîyî kombîyayîş de amade bî.

Kombîyayîşo ke bi deqeyêkê rêzgirewtişî dest pêkerd de, hemsereka Îdareyê Xoserî Sîham Qeyro, qisey kerd û bi rastameyîşê serrgêra Qirkerdişê Seyfoyî şarê Suryanîyî rê serweşîye waşt. Dima ra zî fermandaro pêroyî yê QSD’yî Mezlûm Ebdîyî averşîyayîşê leşkerî û sîyasîyî yê herême, mucadeleyê hemverê hucreyanê DAÎŞ’î û gefê dewleta Tirkî ercnayî.

Dimayê qiseykerdişanê ke ameyî kerdene, pêşnûmeyê vurnayîşê nameyê Buroyê Karê Pawitişî ke bibo Buroyê Pawitişî pêşkêşê meclîsî ame kerdene. Pêşnûme bi zafîya rayan ame tesdîqkerdene.

Dimayê ercnayîş û pêşnîyarîyanê serê nîzamnameyê hêzê gureyê pawitişî, nîzamname pêşkêşê raydayîşî ame kerdene. Nîzamname bi zafîya rayan ame tesdîqkerdene û do bêro bicaardene. Kombîyayîşê meclîsî, bi qerarê wezîfedarkerdişê Îbrahîm el-Hasûdî yê seba endamîya Meclîsê Huqûqî yê Herêma Cizîre qedîya.