Îdareyê Xoserî yê Demokratîkî yê Herêma Efrînî bi wesîleyea serrgêra 21. ya Komployê Mîyanneteweyî ya vera Rayberê Şarê Kurdî Abdullah Ocalanî ame kerdene eşkerayîyêka çapemenîye daye.

Temsîlkaranê dezgehan û meclîsê herême yê roniştoxan beşdarê eşkerayîye bîyî. Eşkerayîye bi kurdkî û erebkî hetê Hemserekanê Kantonê Efrînî Şîraz Hemû û Bekîr Eloyî ra ameye wendene.

Eşkerayîye de qirkerdişê ke heta nika vera şarê kurdî ameyî kerdene ameyî vîrvistene û ame vatene: ''Bi esaretê Rayber apoyî plan resa asta tewr berze. Çunke mabênê 30 serran ê Têgêrayîşê Azadîye yê Kurdîstanî de estbîyayîşê şarê kurdî asta tewr berze de ame îsbatkerdene.''

Eşkerayîye de ame vatene ke Rayberê Şarê Kurdî Abdullah Ocalanî caardişê haştîya herême de wayîrê rolêkê çalakî yo labelê tecrîdkerdişê ey nê firsendî qels keno. Îdareyê Efrînî da zanayene ke tecrîdkerdişê Ocalanî vera qanûnanê mîyanneteweyan û heqanê merdiman o.

Eşkerayîye de wina ame vatene: ''Nameyê Îdareyê Efrînî ser o ma Komployê Mîyanneteweyî yê vera Rayber Apoyî, şarê kurdî û pêro dinya şermezar kenê. Ma dewletan û rêxistinan ra wazenê ke berpirsîyarîya xo ya exlaqî û qanûnî wurzê payan ser û Rayber Apo vera bidê.''