Wezîrê Karanê Teberî yê Tirkî  Hakan Fidanî vat ê do binsazîyanê Iraq û Sûrîye hedef bigêrê. Îdareyê Xoserî yê Rojawanî vat dewleta tirke çend bin kewna, hende înan tehdît kena û herême hedef gena.

Eşkerayîya Îdareyê Xoserî wina ya:

"Dewleta tirke û îdarekaranê ci reyna herêma ma tehdît kerd û dest pê hêrişan kerd. Seba ke hêrişanê xo yê vera şarê bikero meşrû vanê herêmî û dezgehî hedefê projeyê Tirîya yê. Bado ke şarê ma Dêrazorî de sere de dewleta tirke û Sûrîye planê leyminî yê hêzanê teberî pûç vetî, no ziwano tehdîtkar vejîya werte. 

Nê tehdîtî badê çalakîya Anqara yenê kerdene û her meseleya vera Tirkîya de herêma ma yena hedef girewtene. Dewleta tirke sînorê Sûrîye de xeylêk leşkerê  xo ca kerdî. Ciwanê ke Tirkîya ser o şinê Ewropa raştê îşkenceyî yenê û yenê derbkerdene û qetilkerdene. Tirkîya nê sûcanê xo yê rojane xo vîra kena.

Dewleta tirke seba ke meseleyanê xo yê zereyî ra biremo, çalakîya Anqaya bestê ma yo. Ma tehdîtanê dewlata tirke bi şîdetî red kenê û şermezar kenê. Ma sey Îdareyê Xoserî yê Rojawanî wazenê bale biancê nînan ser:

Dewleta tirke bi nê tehdît û hêrişan wazena ma ra qesas bîgêro, çunke projeyê ci yê vera Rojawanî bin kewt. Bi nê tehtîdan kena ke raştîya Tirkîya binimno şarî bixapîno. Nê hêrişî xoverdayîşê ma yê vera DAÎŞî ser o tesîr kenê. Bi nê tehdîtan kenê ke herême de bêhûzûrîye vejê. 

Banê xizmetî yenê hedefgirewtene ke wa her hetî ra tesîro xirab bibo. Nê tewirê dişmenîye yê û kewnê mîyanê kategorîya sûcanê şerî. Sûrîye de rolê wird hetan zî est o. Ganî tewirê xurtî bêrê girewtene ke nê tehdîtî bêrê sînorkerdene. Ma veng danê camîyaya mîyanneteweyî, Koalîsyonê Mîyananeteweyî, dezgehanê huqûq û însanîye yê mîyanneteweyî û Rûsya ke wa vera Tirkîya tewir bigêrê ke verê nê hêrişan bêro girewtene."