22ê temmuze de fermandaranê YPJyî ra Roje Xebûr û fermandaranê Yewinanê Antî-Terorî (YAT) Jîyane Tolhildan û endama YATî Barîne Botan rayîrê Qamişloyî de bi droneyanê çekdaran ê dewleta tirke ameyî hedefgirewtene. Ewro hêrişanê vera Rojawanî de yew leşkerê Şamî û yew sîvîlî dinyaya xo bedilnaye û 8 kesî zî birîndar bîyî.

Îdareyê Xoserî yê Herêma Efrînî ver hêrişê îşxalî û tehdîtanê dewleta tirke Kampa Berxwedanî de eşkerayîye daye û nê pare kerdî: ''Hêrişê dewleta tirke yê vera dewletanê cirananê ci, hemwelatîyan û hêzanê QSDyî mojnenê ke a her hetî ra tengayîye de ya. Dewleta tirek bi hêrişanê xo yê vera Rojawanî wazena DAÎŞî newe ra ganî bikero. Ma tîya ra veng danê komel û rêxistinanê mîyanneteweyîyî ke wa berpirsîyarîya xo ya biehleqî bîyarê ca. Wa paştî bidê xoverdayîşê QSDyî yê vera terorî û hêrişê dewleta tirek yê vera Rojawanî vindarnê.''