Îdareyê Xoserî yê Rojawanî bi wesîleya serrgêra xoverdayîşê Efrînî eşkerayîya nuştekîye daye.

Eşkerayîye de nê ameyî vatene: ''Ma şehîdanê ma yê ke 58 rojî xoverdayîşê Efrînî de ca girewt û ganê xo feda kerd yad kenê. Îşxalkerdişê Efrîn, Serêkanîyê û Girê Sipî dişmenîya dewleta tirke yê vera projeyê demokratîkî yê şaran ê Rojawanî eşkera fîneno çiman ver. Nê cayê ke ameyî îşxalkerdene de sûcê teberê merdimîye û bêehleqî yenê kerdene. Nasnemeyo kolmelkî û kulturkî yeno bedilnayene. Heme cayê ke binê îşxalê dewleta tirke de yê caardişê wînayên estê. Dewamê Îşxalê dewleta tirke yê vera Efrînî semedê heme herêmanê Sûrîye tehluke yo.

Ganî heme hetê Sûrîye derheqê na babete de tewirê xo zelal bikerê. Heme hêzê mîyanneteweyî ke Sûrîye pawenê û wazenê ke wa demokatîk bo ganî vera caardişanê dewleta tirke û çeteyanê ci yê vera şar û herra ma pîya têbigêrê. Ma bêvengîya rayrapêroyîya mîyanneteweyî şermezar kenê û veng danê ke wa vera hêrişê dewleta tirke tewir ramojnê. Ma veng danê ke sere de Neteweyê Yewbîyayeyî (NY) rêxistinê heqanê merdiman û dezgehê mîyanneteweyîyî wa vera caardişanê ke cayê ke ameyî îşxalkerdene de qewimîyene bêveng memanê. Xora seba ke vera îşxalê vera Efînî veng nêvejîya dewleta tirke ewro mudaxaleyê Sûrîye, herême û heme dinya kena ke cayo ke mudaxaleyê ci kena de şer û têmîyankewtiş vejîyeno.

Reyna pêkerdişê ke hetê tay perran û dewleta tirke serê şarê Sûrîye ra ameyî kerdene, ma înan zî şermezar kenê û na babete de hîşyar kenê. Xora badê îşxalê Efrînî hêrişê ke vera şarê Sûrîye yenê kerdene eşkera yê. Dewamkerdişê nê hêrişan semedê hemeyan tehdît o.  Êyê ke paştî danê dewleta tirke semedê înan zî tehdît o. Nê pêrrî vînîkerdişî rê mehkum ê. Ma do bi paştdayîşê şarê xo ser bikewê. Ma do semedê azadkerdişê cayanê îşxalkerdeyan têkoşîn bikerê. Mîrasê xoverdayîşê Efrînî do ma biresno serkewtişî.''