Mihemed Mihemed Şemsî yo ke hemwelatîyê Şehba yo destê DAÎŞî ra zaf dej ant û zaf rey dewa Dêr Hafirî de ame tepiştene, maruzê îşkenceyê DAÎŞî bi.

Şemsîyî da zanayene ke dima ke DAÎŞî herêma înan îşxal kerde zaf astengî antî. Şemsîyî ard ziwan ke reya verêne sebebê şimitişê cixareyî ra o tepişt û 9 rojan perwerde kerd û vat: "Wexto ke ez şimitişê cixareyî ra ameye tepiştene cergêkî waşt ke ez cixareyê kundoxî bişima, mi red kerd û naye ra îşkence bi mi kerd. Înan ez girê da û ez bi nê hawayî bi saetan girêdaye mende.

Reya diyîne ya tepiştişê mi zî sebebê perwerdeyê DAÎŞî ra bîye. Ez tewrê perwerdeyê înan nêbîye. Ê sertîfîka danê kesanê ke perwerde temam kenê. Rojêke mi rê vat ke sertîfîkaya xo bimojne. Mi va seba ke ez nêweş bîye ez nêeşkîya tewrê perwerdeyî biba, coka sertîfîkaya mi zî çin a. A roje zî ez tepişte û qasê 18 rojan ez zindanê înan de mende. Zîndan de her rey şêxêk ameyêne û seba ke mi perwerde biko qisey kerdêne. Cergan domanêko 12 serre ard û sereyê ci birna. Vatêne semedo ke doman kafîr bi o qetil kerd. Zîndano ke ez tede mende nameyê ci El Husbe bi. Beşêkê nê zîndanî cinîyan ra ameyêne meydan. DAÎŞî domanê kêneyî yê qijkekî berdene înan rê tecawuz kerdêne.

Dewa Meskene de bazara Sûq El Nexase de wextê şerê Kobanê de cinîyî û domanê kêneyî yê êzidîyî ke remnaybî rotêne. Rojêke DAÎŞijî kênayêka 15 serre de zewijîya, heman roje 4 cergê bînî zî heman kêna reyde zewijîyayî. Wexto ke kesêkî biwaştêne na herême ra biremo DAÎŞî o tepiştene û sereyê ci birnayêne. Sebebê reya peyêne ya tepiştişê mi no bi ke mi sivîlan herême ra vetêne. Cezaya mi 2 hezar dolar bîye û ez berde zîndanê Reqa. Êyê ke berdene bi Zîndanê Reqa kesêk nêeşkayêne hînî înan ra xeberêke bigêro. Her roje vatêne 'Ma do sereyê to cêr a bikê' û îşkence bi mi kerdêne. Têna wextê werdî de destê ma akerdene, destê ma tim girêdaye bîyî. No wextêk wina dewam kerd. 4 mengî vîyartî û înan ez veradaye."

Şemsîyî tewr peyêne vat bi hezaran kesî bi nê hawayî hetê DAÎŞî ra ameyî qetilkerdene û vîndîkerdene.