Şehba de bi wesîleya serrgêra şeşine ya îşxalkerdişê Efrînî hetê Meclîsê Kantonê Efrîn û Şehba ra çalakîya protestokerdişî ameye organîzkerdene. Bi hezaran efrînijê ke Şehba de manenê tewrê rayraşîyayîşî bîyî.

Qezaya Ehdasî de bi hezaran kesî ameyî têhet. Çalakîye de gileyê zeytînan, fotografê şehîdanê Xoverdayîşê Dewrî û qirkerdişê ke hetê dewleta tirke ra vera Efrîn û Şehba ameyî kerdene, ameyî kiriştene.

Rayraşîyayîş heta Bexçeyê Rayber Apoyî dewam kerd û dima mîtîng ame kerdene.Endama Meclîsê Keyeyanê Şehîdan ê Kantonê Efrîn û Şehba Xedîce Îbo veng da ke wa semedê azadkerdişê Efrînî têkoşîn bêro xurtkerdene.

Hemserekê Meclîsê Ehdasî yê Kantonê Efrîn û Şehba Fewzî Mistefayî zî vera bêvengîya hêzanê mîyanneteweyîyî yê vera îşxalî û sûcanê ke Efrîn de yenê kerdene hêrsê xo ard ziwan û vat, ''Dewleta tirke ya îşxalkere verê çimenê dinya û Konseya Asayîşî de sûcanê qirkerdişî kena. Heta ke Efrîn û heme cayê ke binê îşxalî de bêrê xelisnayene ma do têkoşîn bikerê.''