Hêzê îşxalkerî yê tirkan dewanê Reyhanîye û Menaxî yê Til Temirî ser o bombayan varnenê. Zaf cayan de şer qewimîyeno. Hêrişan bi hawan û topan sate 11:30 de dest pêkerd. Dewê Menaxî û Reyhanîye bîyî hedefê bombardûmane.

Dewan de şerê giranî qewimîyenê

Heman wextî de dewanê Dirboyî û Kinebire yê Til Temirî de hêzanê Meclîsê Leşkerî yê Sûryanîyan cewab da hêrişanê îşxalkeran û mabênê înan û tirkanê îşxalkeran de şerêko giran qewimîya.  Saetanê serê sibayî de zaf dewî bîyî hedefê hêrişan. Dewê Qasimîye, Reyhanîye, Reşidîye û Azîzîye bîyî hedefê obus û hawanan. Heman dewî roja dişemeyî zî bîyî hedefê bambardûmane.Yeno vatene ke dewa Qasimîye de şerwananê QSDyî cewab da hêrişan û herême de şerêko giran qewimîya.
 

Îşxalkerîye, Sucê Şerî, Sucê vera Merdimîye

Dewleta Tirkan a îşxalkere cerganê xo reyde 9ê teşrîna verêne de seba îşxalkerdişî hêrişê Rojawanî kerd. Çarçewa peymananê ke DYA û Rûsya reyde ameyî kerdene de Dewleta Tirkan zaf herêmî îşxal kerdî û bi seyan sivîlî qetil kerdî, bi se hezaran merdimî zî neçare mendî ke warê xo biteriknê. Gore raporanê rêxistinan înfazê kome zî tede zaf sucê şerî yê giranî ameyî kerdene. Îdareyo Xoser îfade keno ke çekê qedexekerdeyî sey gazê fosforî zî ameyî xebitnayene.

25 Rojan de 200 Hêrişî

QSDyî dişemeyî de bîlanço weşana û pare kerd ke mîyanê 25 rojan de Dewleta Tirkan tewr tay 200 rey hêrişê herême kerd. Merkezê Îrtîbatî yê QSDyî eşkera kerd ke 17ê teşrîna verêne wextê adirbirnayîşî yê mabênê Tirkîya û DYA ra nat adirbirnayîş hetê Dewleta Tirkan ra tewr tay 190 rey  ame binpaykerdene. Beyanatî de ame parekerdene ke hêrişanê wextê adirbirnayîşî de 182 şerwanê QSDyî şehîd bîyî û 243 şerwanî zî birîndar bîyî.