Hêzanê Sûrîyeya Demokratîke (QSD) 27ê tebaxe de da zanayene ke vera hucreyanê DAÎŞî yê nimiteyan û şebekeyanê sûcan Dêra Zorê û dormeyê ci de 'Operasyonê Xurtkerdişê Asayîşî' dabi destpêkerdene. Heman wextê operasyonî de artêşa tirke ya îşxalkere û cerganê ci zî seba îşxalê Minbicî hêriş kerd. 

Dewleta tirke 1ê êlule de Roja Haştîye ya Dinya de hêrişê Şehba, Minbic, Til Temir û Eyn Îsayî kerd. Hêrişan de cinî û domanî zî tede sivîlî ameyî hedefkerdene. QSDyî cade cewab da hêrişan.

Dewleta tirke bi taybetî Minbic kerd hedef. Roja verêne ya hêrişan de 4ê ci domanî 5 kesî ameyî qetilkerdene û 7 kesî birîndar bîyî. Hêrişî baregehanê leşkerîyan ê artêşa tirke û cerganê ci ra ameyî kerdene. Cergê Cebhet El Nusra û Ceyşul Hur (OSO) nê baregehan de yê. Destê nê cergan de alê DAÎŞî û serê înan de kincê DAÎŞî est bîyê.

Fermandaranê Meclîsê Leşkerî yê Minbicî ra Ebû El Ehmedî derheqê hêrişanê vera Minbicî de qsiey kerd û vat: ''Cerganê dewleta tirke wextê operasyonê QSDyî de hêrişê Minbicî kerd. Nê hêrişan de sivîlî ameyî armanckerdene. Êyê ke nê hêrişan kenê xo rê vanê ke ê domanê eşîran ê. La na zûr a. Ma sey QSD û Meclîsê Leşkerî yê Minbicî pawitiş û temsîlkarîya eşîran û şarê xo kenê. Ma hêzê xo şarê xo ra gênê. Dewan de şarî zî ma hetî de xo ver da. Şarî cayê xo nêterikna. Şarê ma perwerîya xo bi nê hawayî mojnaye.''

Ebû el Ehmedî îfade kerd ke ê vera hêrişanê îşxalî tim xo ver bidê û vat: ''Teyna Minbic de ney her cayê Rojawanî de ma bi destekê şarê xo û QSDyî hêrişanê dewleta tirke pûç bikerê. Ma do şarê xo reyde vera cerganê dewleta tirke xo ver bidê. Senî ke heta nika şerwanê Meclîsê Leşkerî û şar pîya bîyê nika ra pey zî do pîya xo ver bidê.''