Şagirtê Aram Tîgranî Nûrşîne û Perwîne yê ke Kobanê de perwerdeyê muzîkî danê, ANF'yî rê behsa muzîk ê xo û projeyanê xo kerde û îfade kerd ke ê seba şorişê kulturî xebitîyenê.

Kalê Nûrşîne û Perwîne seba ke nêwaşt bibo hemparê qirkerdişanê Ermenîyan ê serra 1915 koç kerd. Binxet (Rojawanê Kurdistanî) seba xo sey wareyêko asayên dî û verê xo da nê ware. Labelê dimayê se serre wexto ke qirkerdiş ame merdimanê Perwîne û Nûrşîne û şarê herême ser, na reye koçkerdişê înan Kobanê ra Wanî bi. Wexto ke dewleta Tirkî û çeteyanê aye serra 2014 de hêrişê Kobanê kerd, keyeyê Nûrşîne û Perwîne koç kerd Wan. Nûrşîne û Perwîne hema doman bîyê, wextêk Merkezê Huner ê Mezapotomya (NÇM) yê Wanî de perwerde dî. Seba perwerdeyêko weşêr şîyê Amed.

Konserwatuarê Aram Tîgran ê Amedî de, Nûrşîne perwerdeyê Kemanî, Perwîn zî perwerdeyê sentûrî dîyêne. Dima ke qeyûm Şaredarîya Amedî rê ame tayînkerdene û Konserwatûarê Aram Tîgranî yê Amedî ame padayene, mamostayanê dibistane cayêko bîn akerd û Nûrşîne û Perwîne perwerdeyê xo rê cayo newe de dewam kerd. Nûrşîne û Perwîne mengêk verî agêrayê Kobanê û Merkezê Kultur û Hunerî yê Baqî Xido de dest pê perwerdedayîşê muzîkî kerd. Nûrşîne û Perwîne ANF'yî rê behsa muzîk ê xo û projeyanê xo kerde û îfade kerd ke ê seba şorişê kulturî xebitîyenê.

Nûrşîne Merkezê Kultur û Hunerî yê Baqî Xido yê Kobanî de dersanê kemanî dana. Nûrşîna ke dimayê şorişî Merkezê Kultur û Hunerî yê Baqî Xido de dest pê perwerdegirewtişê muzîkî kerd va: "Mi serrêke Wanî de MKM de perwerde dî, dima seba perwerdeyo weşêr ma şî Konserwatûarê Aram Tîgranî. La dimayê wextêkî o zî ame padayene. Mamostayanê ma û wendekaran ê konserwatuarî pê kedanê xo perwerde rê dewam kerd. " Nûrşîne armancê xo yê perwerdedayîşê Kobanî de wina îfade kerd: " Ma wazenê çîyo ke ma musayê, bimusnê domanan."

Perwîne zî va: "Kifş o ke kokê ma tîya de yo, coka key ma koçê Wanî kerd ma xerîbîye ante. Wexto ke mi newe dest pê konserwatûar kerd mamostayanê mi sentûr mojnaye mi ke hacetê muzîk ê rojakewten o zaf bi weşê mi şîyo. Mi Amed de perwerdeyêko weş dî, nika zî wazena ke tîya de domananê Kobanê perwerde bika. Seba ke nika meseleyê ma yê hacetan esto ma bi teorîyêk dest pê perwerdeyî kerd. Wexto ke hacetê bêrê peydakerdene ma do perwerdeyo weşêr bidê."

Nûrşîne û Perwîn ke deyîranê çar parçayan ê Kurdistanî vanê, wazenê ke muzîkê Rojakewtene û rojawanî tê bikê.