Hemserekê Meclîsê Rayberdişî yê Herêma Firatî Mihemed Şahînî derheqê hêrişanê îşxalî yê dewleta tirke de ANFyî rê qisey kerd.

Şahînî ard ziwan ke rixmê peymananê adirbirnayîşî zî dewleta tirke hêrişanê vera Rojawanî rê dewam kena û vat: ''Tirkîya bi bahaneya 'asayîşê sînorî' sînorî ra kewte zere.  Armancê dewleta tirke asayîşê sînorî nîyo. Dewleta tirke serkêşîya Erdoganî de wazena sînoranê xo hîra bikera. Hêrişê vera Rojawanî parçeyê nê planî yê. Tirkîya key pê rayîrê cergan nêeşkaya raşte raşt hêrişê Rojawanî kerd. Serêkaniyê û Girê Spî de operasyonê îşxalî yê taybetî kerdî û armancê ci tim îşxal bi. Dewleta tirke xîret kena ke seba îşxalî xo rê zemînêkî bivîna.''

Şahînî bale ante hêrişanê vera Kobanê ser û îfade kerd ke dewleta tirke pê Dewaya Kobanê ya vera HDPyî û hêrişanê vera Rojawanî qesasê DAÎŞî zî gêna.

Mihemed Şahînî da zanayene ke Rûsya garantora herême ya la rixmê pêro vengdayîşanê înan zî heta nika vera hêrişanê dewleta tirke tewirêk nêmojnayo. Şahînî vat: ''Têgêrayîşê Rûsya qerqilneno. Rûsya ganî mesuldarîya xo bîyara ca.''

Şahînî vist vîrî ke Erdoganî vatbi 'Ma mîlyonêk sûrîyeyîjan apey bişawê' û vat: ''Dewleta tirke îşxalê Idlib, Cerablûs, Efrîn, Serêkaniyê û Girê Spî ra nata kena ke demografîya herême bivurna. Dewleta tirke nê cayan de cergan ca kena. Nika zî bi rayîrê apeyerşawitişê multecîyan wazena demografî binî ra bivurna.''

Mihemed Şahînî dîyar kerd ke têkoşînê vera na rewşe seba Îdareyê Xoserî wezîfe û stratejîya bingeyî ya û vat: ''Ma na babete de qerardar ê. Hetê dîplomatîk, sîyasî û her hetî ra heqê ma est o ke ma mudaxele bikerê. Vera vurnayîşê demografîkî û îşxalê dewleta tirke ma do tim têkoşîn bikerê. Ma venga şarê xo danê ke hêrişanê armancê dewleta tirke şiknayîşê îradeyê şarê ma yo. Şarê ma ganî vera ney bibo yew û têkoşîn pîl bikero.''