Endamê Meclîsê Herêma Rojhelatî ya Dêra Zorê Abdulrehman El Dixêvîjî derheqê hêrişanê Dêra Zorê de ANFyî rê qisey kerd.

El Dixêvîjî ard ziwan ke awanbîyayîşê Îdareyê Xoserî ra dima pêro beşê komelê herême dormeyê ci de yew bîyê, nînan xo rêxistin kerdo û vat: ''Dêra Zorê hetê cografîkî ra herêmêka hîra û bereketîn a û tede xeylê şarî ciwîyenê. Vera Dêra Zorê xîretê provakasyon û nîfaqî est ê. Dima ke Dêra Zorê hetê QSDyî ra ameye xelisnayene meclîsêko hempar ronîya û her kes beşdarê îdarekerdişî bi. Dezgehê herême goreyê qanûnanê Îdareyê Xoserî ameyê rêxistinkerdene û seba xizmetê şarî xebitîyenê.''

El Dixêvîjî îfade kerd ke hukmatê Şamî û tay hêzê herême xîret kenê ke Dêra Zorê ke alozîye vejê û vat: ''Nê hêzî vera Îdareyê Xoserî şerê taybetî kenê. La Dêra Zprê de tewr tay 500 hezar merdimî dormeyê Îdareyê Xoserî de kom bîyî. 

Bawerîya şarî ya bi Îdareyê Xoserî û QSDyî qels nêbîya û hêrişî nêeşkenê yewîya şarî xera bikerê. Ganî ma na yewîya xo bipawê û aver berê. Êyê ke xîret kenê ke cuya xo yê bînan ser o awan bikerê do qetî ser nêkewê. Wextê hêrişanê Şam û Dîfa El Wetenî de karê ma yê meclîsî nêvindertî, eqsê ci xizmetî hîna zaf ameyî kerdene. Şar hetê QSDyî de têgêra û hêrişî pûç kerdî. Ma do vera pêro hêrişan hetê QSD û Îdareyê Xoserî de xo ver bidê.''