Temsîlkara Îdareyê Xoserî yê Rojawanî Evîne Swêd ard ziwan ke rixmê nêzdîbîyayîşê dişmenî yê PDKyî zî şarê Başûrê Kurdîstanî Şorişê Rojawanî de bi aktîfî têgêra, sînorî wedaritî û nê oxirî de bedelî dayî.
Temsîlkara Îdareyê Xoserî yê Rojawanî ya Başûrê Kurdîstanî Evîne Swêd derheqê têkilîya şarê Başûrî ya bi Şorişê Rojawanî de ANFyî rê qisey kerd.
Evîne Swêd vist vîrî ke şarê Başûrî rojanê giranan de paştî daye şarê Rojawanî û vat: ''Wextê şorişî de xeylêk başûrijî derbazê Rojawanî bîyî, şehîd û birîndar bîyî. Şarê Başûrî sînorî wedaritî û herikîya paştî daye şorişî. Şarê Başûrî hema destpêk de eleqeyêko pîl mojna şorişî. Nika zî heman eleqe est o. Zaf kesî wazenê şorê Rojawanî û seba ney yenê noqtaya temsîlkarîya ma ya Silêmanî. Nika vera Rojawan û Başûrê Kurdîstanî hêrişê îşxalî est ê. Ma sey temsîlkarîya Îdareyê Xoserî seba pawitişê şarî xebatanê xo rê dewam kenê. Îdareyo Xoser ê Rojawanî seba yewî û xurtîya şarê kurdî tim amade yo.
Kurdîstan de di modelê îdareyî est ê; modelê Îdareyê Xoserî yê Rojawanî û modelê Başûrî. Pêro kurdî Şorişê Rojawanî sey hêvî vînenê. Ganî wird îdareyî hetkarîya yewbînan bikerê û kêmasîyanê xo raşt bikerê. Eke ma yewîya xo awan bikerê do heqê hêrişan ra bêrê.''
Swêde da zanayene ke Temsîlkarîya Îdareyê Xoserî ya Başûrî 2015 de dest pê xebate kerda û vat: ''Verî ma Silêmanî de temsîlkarîye akerde. Ma armanc kenê ke bi rayîrê temsîlkarîyan Şorişê Rojawanî aver berê, bidê şinasnayene. Hukmatê Başûrî sey şarê Başûrî nêzdîyê Îdareyê Xoserî nêbeno. Ma waştêne ke Hewlêr de zî temsîlkarîye abikerê la parlamentoyî destûr nêda. Par temsîlkarê ma yê fermî Hewlêr de ameyî remnayene û tepiştene. Dima embazê ma sînorî ra teber ameyî kerdene. Embazê ma Ferhad Şiblî zî Kelar de ame qetilkerdene. No Îdareyê Xoserî rê yew mesaj bi. Hukmatê Başûrî o çax serweşîye zî ma ra nêwaşte. Ganî hukmatê Iraqî û herême vera kiştoxan tehqîqat bidê destpêkerdene.''
