Dima ke 2018 de dewleta tirke ya îşxalker Efrîn îşxal kerd tewr tay 300 hezar efrînijî kampanê Şehba de ca bîyî. Şehba mabênê Efrîn û Helebî de ya û 2017 de destê DAÎŞî ra amebî xelisnayene. 

Şehba de 5 kampê efrînijan est ê. Kampa tewr pîle Serdem a, dima kampa Berxwedanî ya û kampê bînî zî Efrîn, Veger û Şehba yê.

Kampê Veger û Şehba Şêrawa de yê. Nê wird kampî her roje benê hedefê bombardumanê dewleta tirke û cerganê ci. Nê kampî goreyê sîstemê komun û meclîsan yenê îdarekerdene. Kampê Serdem, Berxwedan û Efrînî zî Şehba de yê. Nê kampî zî bi rayîrê meclîs komunan îdare benê. 

Hemserekê Meclîsê Kampa Berxwedanî Şêxo Îbrahîmî derheqê cuya kampan de ANFyî rê qisey kerd. Îbrahîmî da zanayene ke verî Kampa Berxwedanî ronîyaya û vat: ''2018 de verî Berxwedan ronîya. Şarê Efrînî sîstemê xo yê îdareyî nê kampan de ard ca. Her komunêk de nêzdîyê 100 û 150 keyeyî est bîyî. Mîyanê meclîsan de zî komîteyê weşîye, perwerdeyî, şaredarîye ûsn. est ê. Xora zehmetîyê xeyman zaf ê. 

Herêma Şehba destpêkî ra nata ninê ablûqa de ya. Her roje dîyena bombayan ver. Hetê bînî ra gefê Rûsya û rejîmê Sûrîye zî dewam kenê. Rixmê hende çîyan zî şar israr keno ke abigêro Efrîn. Efrîn hetê îklîm û herre ra zengîn o. Şehba nêzdîyê Efrînî yo la cografyaya ci cîya ya. Şehba de DAÎŞî dest na erdê şarî ser. La şarê Efrînî reyna zî xeymanê xo xemilneno, bi sebrî zîret keo û hem zî ekonomîya xo keno xurtêr.''

Roniştoxanê Kampa Berxwedanî ra Hacere Xelîla ke meclîsê kampe de xebitîyena, ê tim zî biwazê abigêrê Efrîn. Hacere vat: ''Cuya ma ya Efrîn û yê nikayêne cîya ya. Efrîn de ca û wareyê ma hîra bîyî, ma wayîrê mal û mulkê bîyî. Tîya de ma xeyman de manenê. Ma kenê ke cuya xo rê dewam bikerê, pîya heqê zehmetîyan ra bêrê. Mamostayî û komîteya perwerdeyî zî tîya de bi israrî perwerdeyî rê dewam kenê, domanê ma şinê dibistane. Heyva Sore zî seba weşîya ma 24 saetan xebitîyena.''

Asayîşê kampanê Şehba goreyê kitabanê Rayberê Şarê Kurdî Abdullah Ocalanî hetê Hêzê Pawitişê Komeleî (HPC) ra yeno kerdene. 

Endamê HPCyî Bavê Egîdî pare kerd ke şaro ke bêxoverdayîş maneno, nêeşkeno xo ver bido. Egîdî vat: ''Coka ma bi lêzî hêzê xo yê pawitişî awan kerd. Ma pêro kampan de şarî teqîb kenê, ma kontrol kenê ke kesê xerîbî yenê kampe yan nê.''

Şarê Efrînî çar serrî yo Şehba de mîyanê kampanê koçberîye de xo ver dano û tek armancê ci agêrayîşê Efrînî yo. Şarê Efrînî pê bawer o ke xoverdayîşê înan do ser bikewo.