Şewe teyarayanê dewleta tirke ya îşxalkere herêmê Kobanê, Şehba, Girê Sipî, Zirgan û Dêrik dayî bombayan ver. Pêro qezayanê Kantonê Qamişloyî de hêrişê îşxalî yê dewleta tirke ameyî protestokerdene û mesajê 'Şerê Şarî yê Şorişgêrî' ame dayene.

Tirbêsipîyê, Çilaxa, Girkê Legê, Til Beraq, Til Koçer û Til Hemisî şaran bi çalakîyan hêrişê dewleta tirke şermezar kerdî. Çalakîyan de paştî dîyaye QSD, YPG-YPJ û gerîlayanê HPG û YJA-Starî. Çalakîyan de sloganî ameyî vatene û venga pêro hemwelatîyan dîya ke vera hêrişan bingeyê Şerê Şarî yê Şorişgêrî de xo ver bidê û têkoşîn bikerê. Çalakîyan de fotografê Rayberê Şarê Kurdî Abdullah Ocalanî ameyî kiriştene.