Dewij û koçeranê eşîra Bradostî yê ke dormeyê Koyê Şekîfê û Royê Lolanî de yê, ard ziwan ke înan heywanê xo ardê çerênayîşî, labelê ê binê tehlukeyêkê pîlî de yê.

Sebebo Tekane: Dişmenîya Kurdan!

Roja ke operasyonê îşxalî ameyo destpêkerdene ra nata ma Wareyê Pawitişî yê Medya de û wareyê Bradostî de yê. Ma tîya goş da vatişanê koçeranê eşîra Bradostî.

Mam Îsa Reşît Derwêşo ke koçerêkê dormeyê Royê Lolanî ra yo vat, “Tîya erdê ma yo, dewleta Tirkî ya îşxalkare wazena erdê ma îşxal bikero. Cuya keye û domananê ma binê tehlukeyî de ya. Erdê m abi teyareyanê şerî yenê bombardûmankerdene û pesê ma telef benê. Tekane sebebê nê operasyonî dişmenîya Kurdan a. Ça Kurdêk estbo, dewleta Tirkî hêrişê ûcayî kena. Kurdistan ê ma yo, Bradost ê ma yo. Ma do çi rey nê îşxalî qebûl nêkerê.”

‘Hêzêr Başûrî zî Mesuldar ê’

Cinîya bi nameye Rejîn Îsa ya ke bi qintarê Koyê Şekîfê de bi weyîkerdişê heywanan debara xo kena, aye zî gerreyê perçebîyayîşê Kurdan kerd û vat ke “Her roje teyareyê dewleta Tirkî zozananê ma bombardûman kena. Xeylî heywanê ma telef bîyî. Xozaya ma yena îşxalkerdene. Eke Kurdî yew bibîyêne do dewleta Tirkî nêeşkayêne hêrişê nê doran bikero. Hêzê Başûrî yê ke bêveng manenê zî nê îşxalî ra mesuldar ê. Ma wazenê ke şaro Kurd bibo yew. Se beno wa bibo ma fek erdanê xo ra ver a nêdanê.”

‘Şima Şer de Nêeşkenê PKK’yî Çin Kerê’

Sazîyanê medya yê ke nizdê PDK‘yî yê îdîa kerdêne ke wareyê Bradostî û Xakurkê de zozanî ameyê vengkerdene. La sere de Xinêrê, şar Newala Şêxzadei Lolan, Sinînê, Komasor, Kelaşîn û Xakurkê de vejîyayo zozanan û ma rastê xeylî keyeyanê zozanan ameyî. Dewijê herêma vat ke erdê înan yenê îşxalkerdene û bale ancenê serê hemkarîya hukmatê Başûrî.

Weysî Xidir Reşoyo ke eşîra Bradostî ra yo vat, “Ez veng dana hukmatanê Başûr û Iraqî, ganî hemkarîya xo ya bi îşxalkarîye biqedînê. Qaşo hemverê PKK’yî de şer kenê, la PKK her cayî de yo. Nêeşkenê PKK’yî bi şer bin fînê. Bingeyê demokrasîyî de eşkenê PKK’yî dir qisey bikerê. Serra 2000 de teyareyanê şerî yê Tirkî Qendeqola de 42 kesê sivîlî bi teyareyan kiştî. Cuya ma tehlukeyêkê pîlî de ya. Naye ra zî ganî hêzê îşxalkarî her çar perçeyanê Kurdistanî ra vejîyê.”  

‘Kesê ke Bêveng ê zî Hemkarê Îşxalî yê’

Hecî Xidir Reşoyo ke ma Newala Lolanî de rastê ci ameyî vano ke serra 2004 de rîyê hêrişanê Tirkan ra 130 mêşinê ê telef bîyê û vat ke “Her serre heman hêrişî estê. Dewleta Tirkî erdê ma bombardûman kena. Ganî heme Kurdî hurzê payan ser. Erdê ma yeno îşxalkerdene, la hêzê mîyanneteweyîyî hemverê nê de bêveng manenê. Kesê ke bêveng ê zî hemkarê nê îşxalî yê. Ma do fek erdê xo ra ver a nêdê.”