Dewleta tirke ya îşxalkere rîxmo ke janê vîrusê Korona pêro dinya de vila beno hêrişanê xo yê vera Rojawanî dewam kena. 

Hetkarê Hemserekanê Meclîsê Şêrawa Evdo Berakatî pare kerd ke ê hetêkî ra vera vîrusê Korona şarê xo pawenê hetêkê bînî ra zî vera tehlukeyê hêrişanê dewleta tirke şarê xo pawenê.

Berakatî ard ziwan ke dewleta tirke û cergê ci bi obusan, hawanan hêrişê şarî kenê û vat: ''Ma şarî rê vanê ke keye de bimanê mevejîyê teber. Ne nêweşxaneyê ma estê ne zî doktorê ma. Eke jan bireso tîya netîceyê ci do giran bibê. Şar cara tengasîye, zehmetîye anceno, nika zî nêweşîya vîrusî reyde hêrişanê dewleta tirke anceno. Ganî Erdogan tay vindero. Hwer roje Şêrawa ser o bombayî varanê.''

Kemal Ebdoyê efrînijî zî eşkera kerd ke ê neçare mendî ke bêrê Şêraw û vat: ''Ma mîyanê tehlukeyê vîrusî de yê la dewleta tirke her roj hêrişê ma kena. Ganî no nêro peygoşkerdene.''

Enwer Kaxreyê efrînijî zî vist vîrî ke ê vera zor û zehmetîyanê koçberîye têkoşîn kenê labelê rîyê hêrişanê dewleta tirke ra bi zorî xo pawenê.

Hesenê efrînijî zî vat: ''Xora cara şertê koçberîye zor ê. Nêweşîyêke zî hetêkî ra vejîyaye. Ma 14 keye yê û nêzdîyê 60-70 kesî dibistanêke de manenê. Dibistane cara rewşêka xirabe de ya, hêrişê dewleta tirke zî dewam kenê. Ma hînî nêzanenê ke vera nê h3erişan se bikerê.''