Dewleta Tirkî ya îşxalkare perey ra nata hêrişê Vakur û Rojakewtena Sûrîye kena. Hêrişan de sivîlî hedefê verên ê. Nê sivîlan ra yew zî Ekrem Mihemedo Qamişloyij o ke bîyo qurbanê hêrişanê îşxalkare. Bi seyan herêmîyan şaristanê Qamişlo de seba merasîmê şehîd Ekrem Mihemedî Goristanê Şehîd Delîl Saroxanî de bîyî. Merasîm bi deqayêka rêzgirewtişî dest pêkerde.

Dima endamê Îdareyê Meclîsê Keyeyan ê Şehîdan Hêvî Seyît serweşîye keyeyê şehîdî rê waşte û va: "Şehîdî erjê ma ye tewr gird ê. Bi saya şehîdan ma bîyî wayîrê zafê serkewtişan. Verba pêroyê komployan bi îradeyê şehîdan xoverdayîş geş beno. Binê top û tanganê dewleta Tirkî ya îşxalkare de ma şehîdê xo defin kenê. Nê şehîdan hêz da ma ke ma qet hêrişê Erdoganî rê nêtersenê. Xoverdayîşê ma do heta serkewtişê xoverdayîşî bêro domnayene. No erdo ke gonîyanê şehîdan ra ame sazkerdene qet binî rê nêkeweno."

Hemsereka PYD'yî Eyşe Hiso şexsê şehîd Ekremî de pêroyê şehîdê Kurdistanî vistî vîrî û va: "Naye reya verêne nîya ke dewleta Tirkî ya îşxalkare  hêriş kena. Efrîn de 75 teyarayanê şerî ra kerd û rastê xoverdayîşêko pîlî ameyî. Nika zî şarê herême qerarê xoverdayîşî da. Dewleta Tirkî reyna bi teyara û tang û topan hêrişê Vakur û Rojakewtena Sûrîye kena. Ma Kurdê verênî nîyê ke sereyê xo dewleta Tirkî ver bîyarê ware. Ma pê felsefeya Rayber Apoyî ameyî perwerdekerdene. Wezîfeyê ma peyê şervanê ma de vindertiş o."

Dimayê qiseykerdişan nasnameyê şehîdî ame wendene û şehîd teslîmê keyeyê ci bi. Herêmîyan bi slogananê "Wa Biciwîyo Xoverdayîşê Şaran", "Şehîd Nêmirenê", "Qesas Sozê Ma Yo" cenaze defin kerde.