Dimayo ke Efrîn ame îşxalkerdene se hezar Efrînijan koçê qezaya Şêrawa kerd. Beşêkê Şêrawa binê îşxalê dewleta Tirkî de yo, beşêkê bînî de multecîyî ciwîyenê. Nê Multecîyan ra tayê yan keyeyê roniştoxanê herême de manenê yan zî dibistananê herême de, tayê înan zî kampa Vegerî ya dewa Zîyaretî de manenê. Hêriş û tehdîtê dewleta Tirkî ya îşxalkare û çeteyanê aye dewam kenê. Wendekar û dibistanê zî tesîrê nê herişan û tehdîtan de yê. Dewleta Tirkî û çeteyê aye hêrişê dibistananê qezaye kenê, hetê bînî ra zî rejîmê Sûrîyê înan tehdît keno. Endama Îdareyê Merkez'i ya Şêrawa ya KPC-Demokratîkî Zeyneb Gûbare derheqê rewşa dibistananê merkezê Şêrawa de ANF’yî rê qisey kerd.

Bi Hêrişan Wazenê ke Dewan Veng Bikerê

Gûbare ard ziwan ke cuwa ver Şêrawa de perwerdeyo sîstematîk estbi, dimayo ke Efrînijî ameyî herême, ê neçar mendî ke tayê vurnayîşî bikê û va: "Pê hêrişan wazenê ke şar bitersnê û ware veng bikê. Pêro hêriş û tehdîtê înan sîstematîk ê. Par ma pêro wendekarê xo yê dewan kom kerdî û dibistanê xo akerdî. Dimayo ke multecîyî bananê fermîyan de ameyî cakerdene, ma nêwaşt ke înan vejê. Naye ra ma xo rê alternatîfê cîyayî peyda kerdî. Ma her dewe de yew - di keyeyî peyda kerdî û nê keyeyî kerdî dibistan. Bi nê hewayî ma meseleyê xo çareser kerdî.

Termînê Perwerdeyî wextê Destûrî de yo

Destpêkerdişê destûrî yê hamnanî rê ma seba serra bîne xebitîyayê. Ma hem seba mamostayanê xo û hem zî wendekaranê xo dewreyê perwerdeyî akerdî. Ma dest bi perwerdeyê îngîlîzkî, Erebkî û Kurdkî kerd. Armancê ma no bi ke hem wendekarî perwerdeyî ra dûr nêmanê hem zî binê tesîrê psîkolojîyê şerî de nêmanê. Merkez de 11 dibistanî estî. Nê dibistanan de 1450 wendekarî perwerde vînenê. Di lîseyî estî û nê lîseyan de zî 70 wendekarî estî. Dibistana mîyanêne de polêk seba wendekarê ma yê Erebî esto.‘‘

Tedaya Rejîmê Sûrîye

Gûbare bale ante serê tedayan û tehdîtanê rejîmê Sûrîye û vat: " Dewlete dibistananê xo de Kurdkî qedexe kerd, Labelê dibistananê ma de çîyêko winasên çin o. Herkes eşkeno pê ziwanê xo perwerde bivîno. Par ma bi hewayêkê fermî perwerdeyê xo rê dewam kerd. Dewlete dest na nê dibistanan ser. Nê bînayan de multecîyî estî, dewlete waşt ke înan zî teber bike. Multecîyê ke dewa Banî de mendêne hetê dewletî ra ameyî vetene. Rejîmê Sûrîye tim ma rê meseleyan peyda keno. Wazeno ke perwerdeyê ma asteng biko. Armancê bînî yê dewlete zî no yo ke wazena bibe wayîrê nê bînayan. Nê bînayan de wendekarî estî yan zî çin ê xemê înan de nîyo. Nê dewan de bi seyan keyeyî estî, seba rejîmê Sûrîye ziwanê nê merdiman girîng nîyo"

Hêrişê Dewleta Tirkî

Gûbare parbe kerd ke hêrişê hawanan ê Dewleta Tirkî dibistanan xo rê kenê hedef. Ge ge nê hawanî kewenê kiştê dibistanan û wendekarî tira zaf tersenî. Hêrişê dewlete Tirkî ser psîkolojîyê domanan de tesîrêko xirab virazenê.‘‘

Astengkerdişê Şîyayîş û Ameyîşê Çar Dewan

Gûbare da zanayene dewanê Bircqasê, Kilotê, Gundê Mezin û Başemre yê Şêrawa de ke dormeyê înan ameyî girewtene, zaf wendekar û dibistanî estî, labelê mamostayî ci rê bes nîyê û vat: "Aye ra ma tîya ra mamostayan erşawenê, la şîyayîş û ameyîşê dewan girewte yê. Par seba ke bitemamî rayîrî ameyî girewtene wendekarî bi rojan bê mamosta mendî. Çunke uca de rayîr tena Nubil-Zehra ra vîyareno. O rayîr de şîyayîş û ameyîşî hetê dewlete ra tim yenê astengkerdene."