Perey bi hetkarîya Rûsya û Îranî hêzanê rejîmê Sûrîye rojawanê Helebî bi temamî komanê cergan ê Tirkîya ra pakî kerd. Bi nê hawayî  8 serran ra dima reya verêne eyaletê Helebî kewte binê serdestîya artêşa rejîmî. Serra 2016î zî merkezê Helebî netîceya peymana mabênê Rûsya û Tirkîya de komanê cergan ra amebi vengkerdene.

Serekê rejîmê Sûrîye Beşar Esadî vizêr bi rayîrê televîzyonê dewlete eşkerayîyêke daye û şerê Helebî sey detpêkerdişê serkewtişê peyênî name kerd.

'Operasyonê vera cîhadîstan do dewam bikerê'

Esadî no mesaj da: ''Operasyonê ma yê vera cîhadîstan her cayê Sûrîye de do dewam bikerê. Serkewtişê ma yê Helebî nêno manaya qedîyayîşê şerî. Îdlîb de şer dewam keno.''

Gefê rejîmê tirkî reyde şerê Îdlîbî û rojawanê Helebî dewam kenê

Dewleta tirke bi hêvîya ke operasyonanê vera cergan vindarna vizêrî ra nata Rûya de dîyalogan kena. La Rûsya û Sûrîye operasyonî nêvindartî. 

Rêxistina Çimdarîya Heqanê Merdiman a Sûrîye da zanayene ke vizêrî ra nata Rûsya 110 reyî hêrişê vera rojawanê Helebî û cayanê mabênê Efrînî û Îdlîbî kerd.

Cergê Tirkîya zî bi teyarayanê bêmerdiman xîret kenê ke hêrişê merkezanê Rûsya bikerê.

Serekê Merkezê Leşkerî yê Rûsya Humeymîm Yurî Burnekovî eşkera kerd ke vizêr 2 teyarayanê şerî  waşt ke hêrişê baregehê înan bikerê û Rûsya zî nê hêrişî bêtesîr kerdî.

Neteweyanê Yewbîyayeyan pare kerd ke şerê herême de bi se hezaran kesan koç kerd.

Vengdayîşê Fermandarîya Pêroyî ya QSDyî ra dima herêmanê Rojawanî berê xo seba koçberanê Îdlîbî akerdî.