Şerê Sûrîye de 31 çeteyî û 14 şerwanê rejîmî merdî
Sûrîye de çeteyê ke Enqere paştdayîş danê înan vakurê Hama de hêriş bi hêzanê rêjîmî kerd û netîceyê hêrişî de şerêko giran qewemîya. Ame zanayene, şer de tewr kêmî 45 kesî merdî.
Goreyê Keyeyê Ewnîyayîşî yê Heqanê Merdiman ê Sûrîye gruba Heyet Tahrîr El Şamî ya ke girêdayîya El Nûsrayî ya, vakurê herêma Hama de hêriş bi nuqtayanê rejîmî yê rojawanê Sûrîye kerd.
Keyeyê Ewnîyayîşî da zanayene ke netîceyê şero ke qewemîya yo de 31 çeteyî û 14 şerwanê rejîmî merdî. Ajansê dewlete Sanayî zî da zanayene ke artêşa Sûrîye vernîya hêrişê “grubanê terorîstan” ê vera nuqtayanê eskeran ê Til Melhî yê banlîyo yê bakurê Hama girewt. Goreyê ajansî hêzanê rejîmî xeylî wesayîtê çeteyan zî çin kerdî.Ame zanayene ke grubanê çakdaran, roketî eştî xeylî dewanê vakurê Hama.
