Şervano enternasyonalîst bi nameyê Serhat Tiqqun Facebookî ser de bi ziwanê Franskî mesajêk erşawit û vat, "Ma komêka 10 enternasyonalîstan ê ke Serêkanîyê de embazanê xo yê Kurd, Ereb, Ermenî û Asûrîyan reyde şer kenê."

Şervanî vat, "Bêguman no do bibo mesajê min o peyên. Teyarayê şerî û bambardûmanê artêşa Tirkî bêmabên bombayan varnenê ma ser."

Şervanî parbe kerd ke komê Îslamîstî û ajanê Tirkî xîret kenê ke debikewê mîyanê şaristanî û seba hêzanê mîyanneteweyî vat; "Paştdayîşê înan xemê ma de nîyo. Ma çalakîye wazenê."

Şervanê enternasyonalîstî wina veng da: "Eke hêzê emperyalîstî seba xelisnayîşê ma nêeşkenê mabênê namerdan ra xo bixelisnê, o çax ma pê dostanê xo yê şorişgêran bawer ê ke qesasê ma bigêrê. Hedefê eşkerakerdeyî estî, înan çîn bikê."