Komîteya Perwerdeyê Cimatê Demokratîke (KPC-D) serê waştişê şarê Şêxmeqsûdî ra dibistana bi nameyê Şehîd Qehreman ke do perwerde bi kurdkî bido akerde.

Heta nika dibistane de 50 wendakaran qeydê xo viraşt.

Goreyê hayîdarîyanê selahîyatdaranê dibistane ra dibistane de do 14 malimê ke waranê matematîk, îlmê fenî, hayîdarîyê sosyalî û ziwanê kurdkî de gure bikerê.

Kontorolkara perwerdeyî û malima kurdkî Hêvîn Ebdoya ke ANHAyî rê qisey kerd ard ziwan ke şarê Şêxmeqsûdî domanê xo dibistane de qeyd kerdê û no seva KPC-Dyê Helebî do bibo tecrubeyêko ewilên.

Hêvîne wina dewam kerd: „Do wendekaranê sinifa 1in, 2in û 3ine rê sey perwerdeyê bingeyênî wendiş û nûştişê kurdkî bêro mûsnayene. Sinifa 4in, 5in û 6ine rê zî kîşta kurdkî de do erebkî û îngilîzkî zî sey dersê weçîniteyî bêrê dayene.“

Hêvîne ard ziwan ke hesas bîyayîşê şarî yê perwerdeyê bi ziwanê maye averîyêka pîl a. 

Wendekaran zî ard ziwan ke ê seva abîyayîşê dibistane kêfweş ê.

Komîteya Perwerdeyê Cimatê Demokratîke (KPC-D)yî şûbeyê xo yê Şêxmeqsûdî 7ê Teşrîna verêne de akerdibi.