Fermandarê Pêroyî yê QSDyî Mazlûm Ebdîyî derheqê hêriş û tehdîtanê dewleta tirke yê vera Rojawanî û qewimîyayîşanê peyênan de eşkerayîya çapemenîye daye. Ebdîyî wina qisey kerd:

''Sekê şima zanê di aşmî verî dewleta tirke Rojawan tehdît kerd. Xora tehdîtê înan dewam kenê. Hetê leşkerî ra zî Til Rifet û Minbic de hêzanê xo ana pêser, amadekarîya hêrişî kena. Ma pê bawer ê ke dewleta tirke seba ke firsatê ci nêdîyo hêrişî peyde eşt. Eke firset bikewo dest do cadê hêriş bikero. Amadekarîya xo ya peyêne kena. Dewleta tirke sey bahaneyê hêrişî îdîa kena ke ma şertê pêkerdişê 17 û 22ê teşrîna verêne nêardî ca. La eşkerayo ke dewleta tirke bi xo goreyê nê pêkerdişî tênêgêrena. Aşma ravêrtî de 160 rey vera herêma ma hêrişî ameyî kerdene. 7 rey hêrişê droneyan ameyî  kerdene û 6 sivîlî şehîd bîyî.

Çîyo tewr muhîm zî oyo ke cayê îşxalkerdeyî semedê DAÎŞî bîyî herêma asayîşî. Xeylêk rayberê DAÎŞî yê sey Ebubekîr Bagdadîyî operasyonê ke nê herêman de ameyî kerdene de ameyî kiştene. No zî mojneno ke kam şertanê pêkerdişî binpay keno. Hêzê ma 32 km peyser ancîyayî û hêzê Sûrîye tîya ameyî cakerdene. Vatişê hêzê ma şertê îtîfaqê adirbirnayîşî nêardî ca semedê letekerdişê Sûrîye û vergirewtişê çareserî yo.

Semedê vergirewtişê nê hêrişan zaf xebatî ameyî kerdene. Ma veng da ke wa her kes verê nê hêrişan bigêro. Nika sey 2018-2019 nîyo. Xeylêk welatî sey fermî mebo zî vera nê hêrişanê dewleta tirke tewir genê. Tay tewirê Koalîsyonê Mîyanneteweyîyî û Amerîka est ê la nê semedê vergirewtişê hêrişan qîm nêkenê. Ma heme hêzê xo semedê vindarnayîşê hêrişanê dewleta tirke şuxulnenê. 

No zî têkoşînê vera DAÎŞî ser o do tesîr bikero. Eke hêrişê winayên bibî ma nêeşkenê vera têkoşînê hemparî yê vera DAÎŞî bikerê. Goreyê aşma gulane operasyonê vera DAÎŞî aşma hezîrane de kêmîyayî. Gulane de 73 çeteyî ameyî tepiştene la hezîrane de 30 kesî ameyî tepiştene. DAÎŞ amadekarîya hêrişê pîlî keno. Goreyê zanayîşanê ke ma fînayî dest, wina yew planê ci est o.

Pêvînayîşanê peyênan ê ke ma Rûsya reyde kerdî de ma eşkenê vajê ke derheqê estbîyayîşê artêşa Sûrîye ya Minbic û Til Rifetî de averşîyayîşî est ê. Heta nika heme cehdkerdişê ma oyo ke wa herême mîyanê yewna şerî mekewo.

Eke dewleta tirke hêriş bikero, ma do cewabê xurtî bidê ci. 3 serrî yo ma semedê şerî ya xo amade kenê. Ma Efrîn, Serêkanîyê û Girê Sipî ra tecrube girewt. Hêzê ma yê leşkerî ewro xurtêr o. Eke dewleta tirke hêriş bikero, netîceya ci ma bewlî kenê. Narey nêbeno şerê kurdan û QSDyî, do bibo şerê heme Sûrîye. Êyê ke nêwezanê herra Sûrîye bêro îşxalkerdene do bibê şerê nê pêrune.

Şarê ma zî ganî paştî bido hêzanê ma. Ma ganî pêro pîya xo ver bidê. Ma do pîya bi şarê xo têkoşîn bikerê û nê şerî biqedînê.  Hêriş vera heme Rojawanî yo. Ganî her kes vera ci vejîyo. No wezîfeyê pêrun o. Ganî her kes wezîfeyê xo yê welatperwerîye bîyaro ca.''