Dewleta tirk a îşxalkerdê serrgêra Komployê Mîyanneteweyî yê 9ê Teşrîna Verêne de par vera Rojawanî operasyonê qirkerdişî da desptêkedene. 9ê teşrîna verên a 2019î de Serêkanîyê û Til Abyad de hetê dewleta tirkî ra bi desan qirkerdişî qewimîyayî. Gerîlaya YPJyî Destane Ararata ke vera hêrişê îşxalî  şerê Serêkanîyê de cagirewt qala şer û têkoşînî kerde.

Ararate wina vat: ''AKP-MHP û çeteyanê DAÎŞî hêrişê herra bimbareka ke bi zehmetîyanê pîla ameye destfînayene, kerdêne. Ez verî şîya Til Xelef ke  dormeyê ci amebi girewtene. Ma sey komanê wirdîyan vila bîyî. Ez û embazêke ma yew mewzîya cîya de ca girewt û waştişê ma yo tewr pîl o bi ke ma Serêkanîyê û Girê Sipî dişmenî rê meverdê. Dişmenî zaf hetin hêriş kerdêne. Bi teyareyanê şer û keşîfî, obus û havanan hêriş kerdêne. Embaza ma Bermala ke doçka şuxulnayene çember de mendî bî.  Rixmê tênamendişî têkoşînêko pîl ramojnabi. Embazan aya xelisna la dima ra têkoşînê bianorî de şehîd bîyî.

 Koma ke ma rê nizdîbî ma ci ra xebere nêgirewtene. Sînyalê telsîzî biryaybî. Ma zî goreyê vengê çekan ê pêkewtişan fehm kerdêne hay ça de û goreyê naye ca dayêne xo. Şehîd û birîndarê ma bibî la rixmê naye moral û motîvasyonê ma gird bi. Çeteyî hînî kewtbî Til Xelef. Ez û embaza xo têna mendbî. Di rojî ma bi çeteyan vera yewbînan bî. Til Xelef çayo ke qic o û kuçeyê ci deng ê. Çeteyan heme kuçeyî tepiştbî. Ma di kesî bî ê bi seyan çeteyî bî. Se beno wa bibo ma têkoşîn rê dewam bikerdêne ke herra xo bipawê. Çeteyan banê şerî rijnayene, çêk-çuwelê înan bi kamyonan diznayêne. Ma nê pêrune rê bîyî şahîd. Tewr peynî de malzemeyê ma bi tay û cayê ma yê mewzîkerdişî nêmend ma şî keyeyêk ca da xo. Ma qatê serî ê qatê bînî de bî. Ma ê dîyêne la hayîya înan ma ra çînê bî. Îmkanê me yê pêkewtişî çînê bî. Dorme de çeteyî pirr bî. Ma çeke xo kerdî amade û pîmê bombayanê xo ant û pawit ke eke bi hesîye ma, ma cade pirodê. La înan ma nêdî, ma tarîya şewe de vejîyayî.

Raşta zî têkoşîno pîl û qehremanîye bibî. Bi coş û moralêkê pîlî şer ameyêne kerdene. Têkoşînê Serêkanîye 9 rojî dewam kerd. Têkoşîn pîl bi la kewt destê dişmenî. Mi û heme embazan ma semedê Serêkanîyê û Girê Sipîyî soz da, ma do na herra ke her gama ci bimbarek a peyser bigerê. Dêjê şarî û qîrayîşê înan çirey mi vîrî ra nêşino, do meşiro. Ma do qesasê embazan û şarê xo bigerê. Se beno wa bibo do têkoşînê bi ma ser bikewo.''