Înîsîyatîfê Şarî yê Seba Azadîya Rayberê Şarê Kurdî Abdullah Ocalanî 9ê sibate de Kampanyaya Îmzayan dabî destpêkerdene û 4ê nîsane de kampanya qedîyabî. Çarçewa kampanya de xeylêk îmzayî arê dîyayî. 

Beşdaranê Kampanyaya Îmzayan a Seba Azadîya Abdullah Ocalanî ANFyî rê qisey kerd.

Vervatoxê Înîsîyatîfî Ferzende Munzurî ard ziwan ke ê do îmzayan Yewîya Ewropa, Konseya Ewropa, Mehkemeya Heqanê Merdiman a Ewropa (MHME) û CPTyî rê bişawê. Munzurî vat: ''Şarê Rojawanî bi xurtî tewrê kampanya bi. Çarçewa kampanya de 3 mîlyon, 699 hezar û 90 îmzayî arê dîyayî. Ma venga Meclîsê Ewropa û pêro dezgehanê mîyanneteweyîyan danê ke wa erkê xo bîyarê ca. Rayber Apoyî ra 26 serrî yo xeberêke nêna girewtene. Nimûneya sey ney cayêkê bînî de çin a û no tecrîd nêno qebulkerdene.''

Endama Înîsîyatîfî Nûha Omer vat: ''Hem Rojawanî ra hem zî şaristananê Sûrîye Heleb, Humis û Şamî ra xeylêk kesî tewrê kampanya bîyî. Heta koçerê Lubnanî zî tewrê kampanya bîyî. Ma do nê îmzayan bişawê Parlamentoyê Yewîya Ewropa. Ma amadekarîya komîteyêke kenê ke nê îmzayan bişawê. Armancê ma yo sereke caardişê azadîya Rayber Apoyî yo. Seba ke rêxistinê heqanê merdiman erkê xo bîyarê ca, ma do hîna zaf têkoşîn bikerê.''