Şerê Îdlîbî ra dima mabênê Rûsya û Tirkîya de 5ê adare de peymane amebî îmzakerdene la hema zî şertê peymane nêameyî caardene. Dewleta tirke rewşa vîrusî xo rê sey firsendêk vînena û sewqîyatê leşkeran ê seba herême zêdînena û cayanê neweyan ê kontrolî awan kena.

Rîxmo ke peymana mabênê Tirkîya û Rûsya de ame eşkerakerdene ke pêro xebatê leşkerî do vinderê dewleta tirke hema zî mengêke de Îdlîb de bi desan noqtayê leşkerî ronayî. Keyeyê Çimdarîye yê Heqanê Merdiman (SOHR) o ke merkezê ci London de yo, pare kerd ke Îdlîb de 57 baregehê dewleta tirkî estê.

SOHRî îfade kerd ke dewleta tirke menganê peyênan de herême de xeylêk baregehê leşkerî ronayî û zaf leşkerî tede ca kerdî. Goreyê SOHRî noqtayê leşkerî yê neweyî yê de dewleta tirke Îdlîb de awan kerdî nê yê:

"Anedan, Raşîdîn, Maar Hetat, Seraqîb, El Tarnabeh, Neyrab, Muxir, Qumaynes, Sarmîn, Teftenaz, Maaret El Nehsan, Maaret El Masrin, Jineh, Kefer Karmîn, El Tawamah, Alaya 111'an, Mastumah, Tramnin, Atarîb, Daret Izze, Bardaqlî, Nahlaya, Mutaram, Basniqul, Nebî Eyub, Bazebur, Batabû, Kefer Nûran, Hamadan, El Cinah, Besanqul, Mişrafa, Til Hetab, Bidama, Najiya, Zeyniya, Xesaniyê, Kufeyr, Bernas."

Heman wextî de ame vatene ke hûmara leşkeranê dewleta tirke ya ke 2ê sibate ra nata erşawîyayî Îdlîbî 5 hezar û 745 a. Bi nê hawayî hûmara pêro leşkeranê dewleta tirke ya Îdlîbî 29 hezaran ra zêdêr a.

Eke sewqîyatê leşkerî yê dewleta tirke yê herême hetê sîyasî ra bêro ercnayene û komê cergan zî bêrê hesibnayene hêzê 35 kesî yê dewleta tirke Îdlîb de esto.

Şerê Îdlîbî ra dima Serekkomarê Tirkîya Recep Tayyîp Erdoganî  Moskova û Serekê Rûsya Vlademir Putînî rê waştbi ke adirbirnayîş bêro îlankerdene.

Goreyê peymana adirbirnayîşî Îdlîb de pêro têgêrayîşê leşkerî do biameyêne vindertene, mabênê Heleb û Lazkîye de korîdoro biasayîş do biameyêne akerdene û dima zî 15ê adare de dewrîyeyê Rûsya û Tirkîya do biameyêne destpêkerdene.

La şertê ''vindarnayîşê pêro têgêrayîşan ê leşkerîyan'' û ê di şertê bînî nêameyî caardene.