Fermandaranê Meclîsê Leşkerî yê Til Temirî ra Ehmed Keleşî da zanayene ke artêşa tirke ya îşxalkere vera dewa Um El Kêfî bombaya mîsketî şuxilnaya.

Artêşa îşxalkere serê sibayî ra nata dewe dana bombayan ver.

Fermandar Keleşî pare kerd ke dormeyê Til Temirî û bi taybetî dewa Um El Kêfî rê 150 ra zêdêr hawanî kewtî û vat: ''Artêşa îşxalkere serê sibayî saete 04.00 ra heta 09.30 bi hawayêkê bêmabênî pê bombayanê mîsketanê ke warê mîyanneteweyî de qedexekerde yê, hêrişê Til Temirî kerd û netîceya hêrişî de 6 leşkerê rejîmê Şamî birîndar bîyî. Hêriş de zeraro madî qewimîya û ceyran birîya.''

Fermandar Keleşî îfade kerd ke hêzanê Rûsya dima mudaxeleyê hêrişan kerd. Keleşî dîyar kerd ke ê amade yê ke cewabê nê hêrişan bidê. Keleşî venga hêzanê garantoran Amerîka û Rûsya da ke wa dewleta tirke ya ke hêrişê sivîlan kena vindarnê.

Keleşî vat: ''Şerê di serran de artêşa tirke ya îşxalkere seba ke îradeyê meclîsan û hêzanê leşkerîyan ê QSDyî bişikna her çi kerd la ser nêkewte. Nika zî wazena îradeyê şarî bişikna. La şarê ma reyna xo ver dano, çunke nê hêzan mîyanî de domanê înan est ê û şarê ma soz dano ke heta peynî têkoşîn bikero.''

Artêşa tirke ya îşxalkere êlula 2021î de zî bi bombayanê mîsketan hêrişê Eyn Îsayî kerdbi û netîceya bombardumanî de kesê bi nameyê Ehmed Fecir Şedhanî birîndar bibi.