Endamê Îdareyê Pêroyî yê Hêzanê Asayîşê Zereyî yê Hêrama Dêrazorî Loelhi El Setemî derheqê rewşa asayîşî û xebatanê Dêrazorî de ANFyî rê qisey kerd.

Loehi El Setemî vist vîrî ke bado ke Dêrazor ame azadkerdene bi akerdişê Meclîsê Şarî û Meclîsê Leşkerî xebatanê ronayîşî dest pêkerd û nê vatî: ''Hêzanê Asayîşê Zereyî nê prosesî de rolo muhîm girewt xo ser. Semedê cuyeyêka rehet, bihuzur û biasayîşî ma kewtî mîyanê xebetan. Xora zorîyê nê prosesî bibî.  DAÎŞ herême de bêro qedînayene zî hucreyê ci yê nimiteyî bibî ke înan tim cehd kerdêne ke hêriş bikerî. Nê hucreyan waştêne ke huzur û îstîkrarê Dêrazorî bixeripnê ma zî verê înan girewtêne. Şarê herême û eşîran zî paştî dayêne ma.

Hetê bînî ra hukmatê Şamî û çeteyanê sey Difaa Al Watani yê Îranî zî hêrişê Dêrazorî kerdêne. Gama ke wiverê awe de nê çeteyan hêriş kerdêne hucreyanê nimiteyan zî herême de dahîna rehat karê xo rayra berdêne. Nê hêrişan ra ziraro tewr pîlî şar dî û xeylêk kesan zî dinyaya xo bedilnaye. Nizdê serreke yo vera çeteyan serkêşîya Hêzanê Asayîşê Zereyî de operasyon dîya destpêkerdene. QSD û dezgehenê herême paştî daye nê operasyonî. Vera QSD û nuqtayanê asayîşî hêrişî ameyî kerdene. Nê hêrişan de zî şarî ziraro pîl dî. Zafê nê hêrişan herêmanê binê îdareyê Şamî ra bîyî. Ge-ge hêrişê winayên benê. Wazenê şarî bitersnê û îqtîkrarî bixeripnê. Ma do testûr nê medê.

Pawitişê asayîşê herême wezîfeyê ma yo. Ma hem vera hucreyanê nimiteyan, hem tacîranê narkotîkî hem zî vera sûcanê organîze xebatanê xo bêmabên rayra benê. Kesê ke tewrê Hêzanê Asayîşê Zereyî benê, yenê vîjnayene û akademîya taybete de perwerde vînenê. Nê akedemîyan de perwerdeyê îdeolojîk û leşkerî genê. Seba ke herême de perwede û xizmeto tewr hol bibo, xebatî yenê kerdene. Ma deyndarê şarê xo yê. Ma do sey domananê Dêrazorî herêma xo heme hêrişan ra bipawê. Têna hêzeko semedê heme komelî xebityeno dezgehê Îdareyê Xoserî yê. Ma veng danê ke wa her kes semedê huzur û îstîkrarê Dêrazorî dormeyê Îdareyê Xoserî de bêro têhet.''