Bîtrus Beşîro ke lajê ci reyde keyeyê ey ra 3 kesî şehîd bîyî û mîyanê şorişî de ca gêno ANFyî rê qisey kerd û îfade kerd ke şehadet zî tede bi her hawayî înan fedakarîye girewte verê çimanê xo.

Bîtrûs Beşîro ke babîyê şehîd Baran Serhatî yo, 1957 de dewêka Qamişloyî de dadîya xo ra bîyo. Ey 1986 de têkoşîno sosyalîst şinasna û 2010 de mîyanê dezgehanê Îdareyê Xoserî de ca girewt.

Beşîrî vat: ''Taxa Qanatsuveysî de fabrîkaya brîketan estbî, 35 serran ez uca de xebitîya. Mi dî ke xizan û kedkarî yenê eciqnayene. Mi o çax partîya Komunîste awan kerde. Prosesê şorişî de ma embazanê xo reyde pêvînayîş kerd. Sey şarê sûryanîyan ma dî ke no şoriş seba ma yo. Coka ma tewrê ci bîyî. Ma dezgehê xo awan kerdî, şerwanê xo rêxistin kerdî, pêro cepheyan de ser kewtî û nê pêroyî zî bi paradîgmaya Rayber Apoyî bîyî. Ma o nêşinasna la fikrê ey şinasnayî. 8 ferdanê keyeyê xo reyde ez û cinîya mi, ma tewrê xebatanê şorişî bîyî.

Seke Seyda Cegerxwînî vatbi yewîye ra ber çareserîya ma çin a. Şoriş do bin nêkewo. Ganî her kes tewrê şorişî bibo. No şoreş nasnameyê ma yo. Wexto ke ma tewrê şorişî bîyî şehadet zî tede bi her hawayî fedakarîye girewte verê çimanê xo. Partîya Çepe ra lajê mi Baran Serhat, Zozane Kobanê û Demhat şehîdê keyeyê ma yê. Sey babîyêkî ez dejena labelê ez pê zanena ke şoriş zî bêbedel nêbeno. Ciwanî hêvîyê ma yê. Nê şorişî pê ciwanan dest pêkerd û pê ciwanan dewam keno.''