Hemserekê Pêroyî yê DEM Partî Tuncer Bakirhani wextê eşkerakerdişê deklerasyonê Newroze yê Amedî de veng da ke wa Newroze de vengdayîşo tarîxî yê Rayber Apoyî bi hewayêkê xurtî bêro wayîrvejîyayene.
Newroze emser 89 merkezan de bi şîarê ''Rayberîya Azade, Komelo Demokratîk'' û ''Semedê Azadîye Newroza Komelê Demokratîkî'' do bêra pîrozkerdene. Sûrê Amedî de deklarasyonê Newroze ame eşkerakerdene.
Hemserekanê DBPyî Çîgdeme Kiliçgun Uçar kirmanckî qisey kerd û nê vatî: ''Ma emser bi vengdayîşê 'Haştîye û Komelê Demokratîkî' ver bi Newroze şinê. Nameyê Newroze semedê ma xoverdayîş o, adirê ci roşnayîyêk a. No xoverdayîş reyberê ma yo. Bawerîya elewîyan de bawerîya sey Heftemal est a. Goreyê nê heme xoza, darî secde kenê. Yanî xoza yena ziwan, bena ganî. Komel zî xozayêk a. Ma zî gama ke kewnî tengayî sey xozo xover danê û payra manenê. Tarîxê şaran de manayê xoverdayîşî no yo. Çîyo ke Kawayî kerd ewro şarê kurdî zî nê keno. Mazlûm Doganan û Zekîye Alkanan zî no kerd. Nînan mîjdanê azadîye daye ma. Gerek na mîjdan bi vengdayîşê 'Haştîye û Komelê Demokratîkî' bêro xurtkerdene.''
Çigdeme Kiliçgun Uçar bale ante pêkerdişê QSD û HTŞyî yê 10ê adare ser û vat: ''Paştîya ma modelê Rojawanî ra pêt a, bawerîya ma statûyî rê est a. Ma hêvî kenê pratîkê QSDyî Sûrîye de bibo modelê cuyeyêka hempare. Felsefeya Jin jiyan Azadî heme dinya de yena vatene .Vengdayîşê komelê demokratîkî yê Rayber Apoyî semedê haştîyaa şaran serkêşîye keno. Ma vanê ke; wa Rayberê Şarê Kurdî Birêz Ocalan bibo azad û heme komelî rê azadîye bîyaro.''
Hemserekê Pêroyî yê DEM Partî Tuncer Bakirhanî zî nê vatî:''Ma prosesê tarîxî ra ravêrenê. Coka gerek Newroze zî goreyê nê rojan bêro pîrozkerdene. Ma Newroze de dahîna zaf wayîrê vengdayîşê tarîxî bivejê. Ma tîya ra vengê azadîya biresnê Îmraliyî. Pêkerdişê Şamî zî zaf muhîm o. O zî raştê nê rojanê roşanê xoverdayîşî Newroze ke wisarê şaran o ame. Mutabakat zaf zleal o. Goreyê vengdayîşê Birêz Ocalanî yo. No mutabaqat do elewîyan zî qirkerdişî ra bixelisno. Newroza emserî zaf muhîm a. Gerek na Newroze bibo cewabê vendayîşê Birêz Ocalanî û pêkerdişê Sûrîya. Coka gerek nê wird qewimîyayîşî Newroze de bêrê tacîdarkerdene. Newroza 2005î do bido Newroze tarîxî. Newroza me pîroz be, Newroza gelan pîroz be.''
Serekê Pêroyî yê Partîya Azadî Ayettulah Aşitî zî qiseykeridşê xo de bale ante muhîmîya ziwanê dayîke ser û veng da ke wa her kes wayîrê kurdkî bivejo bi ziwanê dayîkî qisey bikero.
Badê eşkerayîye Hemserekanê Pêroyî adirê Newroze vist a û dormeyê adirî de bi defû zûrna govende ameye girewtene.
